ԱՄՆ-ը կսահմանի նոր պատժամիջոցներ Իրանի դեմ

Միացյալ Նահանգները  նոր պատժամիջոցներ է սահմանել Իրանին առնչվող վեց կազմակերպությունների և երկու ֆիզիկական անձանց նկատմամբ: Այս մասին հայտարարություն է տարածել ԱՄՆ-ի ֆինանսների նախարարության կայքը։

«Այսօրվա միջոցառումները պատժամիջոցների երկրորդ փուլն են, որոնք ուղղված են Իրանի զենք տարածողներին, երբ նախագահ Դոնալդ Թրամփը վերսկսեց «առավելագույն ճնշման» քաղաքականությունը Իսլամական Հանրապետության դեմ», -ասված է ֆինանսների նախարարության հայտարարության մեջ:

Ըստ գերատեսչության հայտարարության՝ պատժամիջոցների ենթարկված անձինք և կազմակերպությունները «Պատասխանատու են եղել անօդաչու թռչող սարքերի (ԱԹՍ) բաղադրիչների ձեռքբերման համար՝ իրանական «Qods Aviation Industries» (QAI) ընկերության անունից, որը Իրանի անօդաչու թռչող սարքերի ծրագրի առաջատար արտադրողն է»:

«Իրանի կողմից անօդաչու թռչող սարքերի և հրթիռների տարածումը, ինչպես տարածաշրջանում իր ահաբեկիչների դաշնակիցներին, այնպես էլ Ռուսաստանին՝ Ուկրաինայի դեմ օգտագործելու համար, շարունակում է սպառնալ խաղաղ բնակչությանը, ԱՄՆ-ի անձնակազմին, մեր դաշնակիցներին և մեր գործընկերներին»,-   հայտարարել է ԱՄՆ ֆինանսների նախարար Սքոթ Բեսենթը:

ԱՄՆ ֆինանսների նախարարը հավալել է նաև, որ իրենք  կշարունակեն խափանել Իրանի ռազմարդյունաբերական համալիրը, ինչպես նաև՝ անօդաչու թռչող սարքերի, հրթիռների և սովորական սպառազինությունների տարածումը։

«Այդ ամենը շատ հաճախ հայտնվում է ապակայունացնող ուժերի, դրանց թվում՝ ահաբեկչական կազմակերպությունների ձեռքում»,- ասել է նա։