Վաշինգտոնի դատարանը՝ «Ազատություն» ռադիոկայանը փակելու Թրամփի որոշման մասին

Վաշինգտոնի դաշնային շրջանային դատարանը երեքշաբթի բավարարել է «Ազատ Եվրոպա/Ազատություն» ռադիոկայանի հայցը` ընդդեմ ԱՄՆ Գլոբալ լրատվամիջոցների գործակալության (USAGM):

Դատարանը որոշել է, որ մինչև գործի էության քննությունը գործակալությունը պետք է ձեռնպահ մնա այնպիսի քայլերից, որոնք կարող են ուղղված լինել «Ազատություն» ռադիոկայանի փակմանը: Այս միջոցները ներառում են մարտի 15-ին USAGM-ի ավագ խորհրդական Քերի Լեյքի կողմից հայտարարված որոշումը՝ դադարեցնելու դրամաշնորհային համաձայնագիրը, ըստ որի՝ «Ազատություն» ռադիոկայանը Կոնգրեսի ֆինանսավորումն է ստանում USAGM-ի միջոցով իր աշխատանքի համար:

Դատավոր Ռոյս Լամբերթը 10 էջանոց վճռով որոշել է, որ վճռի կատարումը «Ազատություն» ռադիոկայանին «անուղղելի վնաս» է պատճառելու։

«USAGM-ի ղեկավարությունը չի կարող մեկ արտահայտությամբ և գրեթե առանց հիմնավորման ստիպել «Ազատություն» ռադիոկայանին դադարեցնել գործունեությունը, նույնիսկ եթե նախագահը հրամայել է դա անել»,- գրել է դատավորը։