Ռանոսն արձագանքել է ՀՀ ազգային հավաքականից հեռացվելու որոշմանը

21-ամյա հարձակվող Հրանտ-Լեոն Ռանոսն արձագանքել է ՀՀ ազգային հավաքականից հեռացվելու՝ թիմի գլխավոր մարզիչ Ջոն Վան՛տ Սխիպի որոշմանը:

«Բոլոր նրանք, ովքեր ինձ ճանաչում են, գիտեն, որ իմ երկրի՝ Հայաստանի համար խաղալն ինձ համար հնարավոր ամենամեծ պատիվն է:

Վստահ լինելով ազգային թիմի մարզչի հետ երեկ ունեցած խոսակցության գաղտնիությանը՝ ես ցանկանում էի խոսել իմ իրավիճակի մասին: Ցանկանում էի նրան տեղյակ պահել, որ ես պատրաստ եմ, ինձ լավ եմ զգում և լիովին մոտիվացված եմ խաղալու ու օգնելու թիմին:

Ի զարմանս ինձ՝ մարզիչն ինձ ասաց, որ առաջիկա խաղում ինձ հետ որևէ հույս չի կապում: Սա, բնական է, ինձ շատ վշտացրեց: Քանի որ խաղաժամանակ ստանալն այս պահին ինձ համար շատ կարևոր է, և ես այն ստանալու որևէ հեռանկար չունեի, համաձայնվեցի վերադառնալ Կայզերլաուտերն՝ պատրաստվելու հաջորդ խաղին: Եվ մենք սա միասին որոշեցինք:

Ցանկանում եմ ընդգծել, որ ինձ համար ավելի լավ բան չկա, քան իմ երկրի՝ Հայաստանի համար խաղալը, և որ դա միշտ այդպես կլինի»,- գրել է Ռանոսը սոցիալական ցանցերի էջում: