Ուրախ եմ, որ Պեդրոն իր մեջ այդքան ազնվություն ու քաջություն գտավ. Ալեն Սիմոնյան
Ալեն և Կառլեն Սիմոնյաններից ստացել եմ նույն բովանդակությամբ երկու նամակ՝ փետրվարի 19-ի իմ գրառման մեջ տեղ գտած անճշտությունները շտկելու և զրպարտության համար ներողություն խնդրելու պահանջով։ Իմ տրամադրած տեղեկատվությունը այն էր, ինչ հասանելի էր ինձ՝ հիմնվելով իմ կարդացած լրատվական աղբյուրների վրա, և ես որևէ վնասի կամ զրպարտության նպատակ չեմ ունեցել: Այս մասին ֆեյսբուքյան իր էջում գրել է Երևանի ավագանու «Ազգային առաջընթաց» խմբակցության անդամ Պեդրո Զարուկյանը:
«Նրանք իմ մեկնաբանություններում գտել են երկու խնդիր, որոնք ես կցանկանայի ուղղել և պարզաբանել, որ ես զրպարտության նպատակ չունեի:
Նախ, թեև ես նշել էի, որ 2021-2024 թվականներին Կառլեն Սիմոնյանը եղել է ընկերության տնօրենը և ոչ սեփականատերը, սակայն տեղյակ չէի, որ Կառլեն Սիմոնյանը 2023 թվականի ապրիլի 12-ին հրաժարական է տվել ընկերությունից։ Ուստի ուզում եմ հստակեցնել, որ Կառլեն Սիմոնյանը 2023 թվականի ողջ ընթացքում չի եղել տնօրենը և ես նրան զրպարտելու մտադրություն չեմ ունեցել։
Երկրորդ՝ ես կարդացել էի փետրվարի 19-ի Armlur հոդվածը հետևյալ վերնագրով «Ալեն Սիմոնյանի եղբոր ղեկավարած ընկերությունը, որ հարյուրավոր միլիոն դրամի մրցույթներում է հաղթել, գնում է սնանկացման. «Ժողովուրդ»», որից հետո արեցի հետևյալ մեկնաբանությունը. "Այսօր Armlur-ը տեղեկացրեց, որ Ալեն Սիմոնյանի եղբայրը սնանկության միջոցով փակել է իր «ԵվրոԱսֆալտ» ընկերությունը։ Հարց առաջացավ, թե ինչու է փակվում այդքան գերշահութաբեր բիզնեսը, և ես մտա Armeps.am՝ տեսնելու ...." Ուզում եմ հստակեցնել, որ ես տեղյակ չեմ եղել, որ Կառլեն Սիմոնյանն այլևս «Եվրոասֆալտ»-ի տնօրենը չէ, և որ Կառլեն Սիմոնյանն անձամբ սնանկության դիմում չի ներկայացրել։ Ես մտադրություն չունեի մեկնաբանություններում այս անճշտությունով որևէ կերպ ազդել Ալեն և Կառլեն Սիմոնյանների համբավի վրա»,- գրել է նա:
ԱԺ նախագահ Ալեն Սիմոնյանն էլ իր հերթին արձագանքել է Պեդրո Զարուկյանի գրառմանը. «Դե ինչ, հարգելի ընկերներ, Երևանի ավագանու անդամ Պեդրո Զարոկյանը փաստացի հերքեց իր փետրվարի 19-ի գրառումը, որում ինձ, իմ եղբորը վերագրում էր ճանապարհաշինությամբ զբաղվող ընկերության հետ կապի մեջ և անհավանական քանակի պետական տենդերներ շահելու մեջ»
«Ուրախ եմ, որ Պեդրոն իր մեջ այդքան ազնվություն ու քաջություն գտավ՝ ընդունելու իր բացթողումը և հրապարակավ շտկելու այն, ինչը հարգանքի արժանի քայլ եմ համարում:
Հայցը, բնական է, այլևս անիմաստ է դառնում, մնում է, որ իրենց անկախ և օբյեկտիվ հռչակած լրատվամիջոցներն այն ջանասիրությամբ, ինչպես գրում էին, որ Ալեն Սիմոնյանը, իր եղբայրը կապ ունեն ճանապարհաշինական կազմակերպության հետ և հարյուր-միլիոնավոր դոլարների տենդեր է շահել, հետո սնանկացել, հիմա նույն ջանասիրությամբ հերքեն դա:
Դե ինչ, անկախ, ազատ, արհեստավարժ, օբյեկտիվ և ոչ «դեղին մամուլ», կսպասենք Ձեր արձագանքին»,-գրել է Ալեն Սիմոնյանը թելագրամի իր ալիքում։
