Ուկրաինան մերժել է ԱՄՆ-ի առաջարկը

Ուկրաինայի նախագահի խորհրդական Դմիտրի Լիտվինը մերժել է ԱՄՆ-ի հատուկ ներկայացուցիչ Քիթ Քելլոգի առաջարկը՝ երկրում ընտրություններ անցկացնելու վերաբերյալ: Կիևում Վաշինգտոնին կոչ են արել ցուցաբերել «ավելի խորը մոտեցում»:

Ուկրաինացի պաշտոնյան կիրակի օրը X սոցիալական ցանցում գրառում է կատարել՝ անդրադառնալով Քելլոգի՝ Reuters-ին տված հարցազրույցին. «Մենք չենք տեսել պարոն Քելլոգի ամբողջական հարցազրույցը, միայն մի քանի մեջբերումներ ընտրությունների մասին, ուստի դժվար է ամբողջությամբ գնահատել նրա դիրքորոշումը: Սակայն, եթե նրա ծրագիրը սահմանափակվում է միայն զինադադարով և ընտրություններով, ապա դա ձախողված ծրագիր է: Պուտինին այդ երկու բաներով չեն վախեցնի: Մոսկվան շարունակում է մեծացնել հրթիռների և զինամթերքի արտադրությունը, պատժամիջոցները շրջանցելու նոր ուղիներ գտնել և նավթից եկամուտ ստանալ: Ակնհայտ է, որ այս զենքերը չեն ստեղծվում ժողովրդավարական հարևաններին հարգելու համար: Ռուսաստանի և Հյուսիսային Կորեայի ռազմական դաշինքը նույնպես հրադադարի պահպանմանը չի նպաստում:

Այդ իսկ պատճառով մենք կնախընտրեինք տեսնել հիմնական գործընկերների պաշտոնյաների կողմից ավելի խորքային մոտեցում: Միաժամանակ, մենք հիշում ենք, որ նախագահ Թրամփը նախագահ Զելենսկու հետ հանդիպումների ժամանակ խորապես և խելամտորեն է վերլուծել իրավիճակը և նշել, թե ինչն է կարող իրականում ճնշում գործադրել Պուտինի վրա: Այդ պատճառով կարևոր է արագ անցնել թիմերի միջև կոնկրետ պլանի վրա աշխատանքին՝ պատերազմը դադարեցնելու և կայուն խաղաղություն ապահովելու համար»: