ԱՄՆ–ն կհասնի նավթի գնի իջեցման. Դոնալդ Թրամփ
ԱՄՆ-ն Սաուդյան Արաբիայից և ՕՊԵԿ-ից կհասնի նավթի գների իջեցման, այդ թվում՝ Ռուսաստանի վրա Ուկրաինայի հարցում ճնշում գործադրելու համար: Այս մասին ԱՄՆ նախագահ Դոնալդ Թրամփը հայտարարել է Դավոսի Համաշխարհային տնտեսական ֆորումի մասնակիցներին տեսակապի միջոցով, գրում է ТАСС–ը:
«Ես մտադիր եմ նաև խնդրել Սաուդյան Արաբիային և ՕՊԵԿ-ին իջեցնել նավթի գինը»,- ասել է Թրամփը։ Նա պնդել է, որ «եթե գինը իջնի, պատերազմը Ռուսաստանի և Ուկրաինայի միջև անմիջապես կավարտվի, բայց այս պահին գինը բավական բարձր է այս պատերազմը շարունակելու համար»:
Թրամփի խոսքով՝ ՕՊԵԿ երկրները վաղուց պետք է իջեցնեին նավթի գինը, այդ դեպքում, ըստ նրա, Ուկրաինայում հակամարտությունն արդեն ավարտված կլիներ։
ԱՄՆ նախագահը նաև ասել է, որ Սաուդյան Արաբիան ներկայումս ներդնում է մոտ 600 միլիարդ դոլար հյուսիսամերիկյան երկրում, սակայն նա Սաուդյան Արաբիայի գահաժառանգ արքայազն Մուհամմեդ բեն Սալման Ալ Սաուդին կխնդրի «կլորացնել այդ թիվը մինչև 1 տրիլիոն դոլար»։
