Լավրովը բացատրել է Սիրիայում իրավիճակի արագ զարգացումը

ՌԴ ԱԳ նախարար Սերգեյ Լավրովը Սիրիայում իրավիճակի արագ զարգացումը բացատրել է նախկին նախագահ Բաշար Ասադի՝ երկրում սոցիալական խնդիրները հաղթահարելու անկարողությամբ, որոնցում ավերիչ մեծ դեր խաղացին Միացյալ Նահանգների քայլերը։ Այս մասին նա հայտարարել է ՏԱՍՍ-ին տված հարցազրույցում։

«Արդեն հիմա կարող ենք ասել, որ իրավիճակի դեգրադացիայի պատճառներից մեկն այն էր, որ նախկին ղեկավարությունը տևական քաղաքացիական հակամարտության համատեքստում չկարողացավ բավարարել բնակչության հիմնական կարիքները»,- ասել է նախարարը։

ՌԴ արտգործնախարարի խոսքով՝ սիրիական տնտեսությունը «խեղդելու» այս գիծը մշտապես սոցիալական դժգոհություն է առաջացրել։

«Այս իրավիճակում իշխանությունները ստիպված եղան ձեռնարկել ոչ պոպուլյար միջոցներ, մասնավորապես՝ նվազեցնելով կամ վերացնելով սոցիալապես կարևոր ապրանքների և ծառայությունների սուբսիդիաները», - շարունակել է նա։