«Ռոսավիացիայի» տնօրենը նոր մանրամասներ է հայտնել կործանված ինքնաթիռի դեպքից

Ակտաուի օդանավակայան թռչելու որոշումը կործանված AZAL ինքնաթիռի օդաչուն ինքնուրույն է կայացրել: Այս մասին հայտնել է «Ռոսավիացիայի» տնօրեն Դմիտրի Յադրովը:

«Ղազախստանում կործանված Azerbaijan Airlines (AZAL) ավիաընկերության ինքնաթիռի կապիտանին Գրոզնիում վայրէջքի փորձերից հետո այլ օդանավակայաններ են առաջարկվել, սակայն նա որոշել է թռչել Ակտաու»,- ասել է Ռոսավիացիայի ղեկավար Դմիտրի Յադրովը։

Նա տեղեկացրել է նաև, որ այդ ժամանակ Գրոզնիի օդանավակայանի տարածքում մտցված է եղել «գորգ» ռեժիմը, որը նախատեսում էր նշված տարածքից բոլոր օդանավերի անհապաղ հեռացում: Օդանավի հրամանատարը Գրոզնիում ինքնաթիռը վայրէջք կատարելու երկու փորձ է կատարել, որոնք անհաջող են եղել։

Հիշեցնենք` դեկտեմբերի 25-ին Ղազախստանի Ակտաու քաղաքի մերձակայքում ընկել ու բռնկվել է Azerbaijan Airlines ավիաընկերության Embraer 190 ինքնաթիռը, որը կատարում էր Բաքվից Գրոզնի չվերթը: Այն աղետի է ենթարկվել օդանավակայանի հարևանությամբ։ Ինքնաթիռում եղել է 62 ուղևոր և անձնակազմի 5 անդամ։ Ըստ Ադրբեջանի գլխավոր դատախազության՝ 32 մարդ ողջ է մնացել։