Սլովակիայի վարչապետը Մոսկվայում է՝ Պուտինի հետ բանակցությունների համար
ՌԴ նախագահ Վլադիմիր Պուտինը Կրեմլում ընդունել է աշխատանքային այցով Մոսկվայում գտնվող Սլովակիայի վարչապետ Ռոբերտ Ֆիցոյին: Այս մասին տեղեկացրել է ՌԴ նախագահի մամուլի քարտուղար Դմիտրի Պեսկովը, գրում է РИА Новости–ն։
Նա հավելել է, որ Պուտինն ու Ֆիցոն բանակցություններ են վարում Կրեմլում, հանդիպումն ընթանում է դեմ առ դեմ ձևաչափով։ Նա նշել է, որ Սլովակիայի վարչապետի այցը պլանավորված է եղել օրեր առաջ:
Ավելի վաղ Սլովակիայի վարչապետ Ռոբերտ Ֆիցոն Ուկրաինային լուրջ կոնֆլիկտով էր սպառնացել, եթե Կիևի իշխանությունները թույլ չտան գազի տարանցումը երկրի տարածքով:
Ֆիցոն համապատասխան գրառումը կատարել էր իր ֆեյսբուքյան էջում:
«Եթե Զելենսկին բաց չթողնի մեր գազը, կարող է լուրջ կոնֆլիկտ առաջանալ»,- ասվում է հրապարակման մեջ։
