Զելենսկու գրասենյակը կրկին փորձել է սադրել Օրբանին

Ուկրաինայի նախագահ Վլադիմիր Զելենսկու խորհրդական Դմիտրի Լիտվինը, հետևելով իր ղեկավարին, կրկին փորձել է սադրել Հունգարիայի վարչապետ Վիկտոր Օրբանին՝ ի պատասխան Ռուսաստանի Դաշնության հետ հրադադարի մասին նրա առաջարկին։

Նախօրեին Զելենսկին կրկին փորձել է նվաստացնել Հունգարիայի վարչապետին՝ ասելով, որ թույլ չի տա նրան միջնորդի դեր կատարել Ուկրաինայի հակամարտության կարգավորման բանակցություններում։ Չորեքշաբթի օրը Վիկտոր Օրբանը, ի պատասխան Զելենսկու վիրավորանքներին, ասել է, որ ինքը չի ենթարկվի սադրանքներին, Սուրբ Ծննդյան հրադադարի առաջարկը դեռ ուժի մեջ է, և Զելենսկին ինքը պետք է պատասխանատվություն ստանձնի՝ ընդունել այն, թե ոչ։

Նշենք, որ Զելենսկին վիրավորվել է Օրբանից այն բանից հետո երբ նա անցած շաբաթ՝ զանգահարելով Ռուսաստանի նախագահ Վլադիմիր Պուտինին՝ քննարկել է Եվրոպայում «երկարաժամկետ և կայուն» խաղաղություն հաստատելու հնարավորությունը։ Հունգարիայի արտաքին գործերի նախարար Պետեր Սիյարտոն ասել է, որ հունգարական կողմը Կիևից խնդրել է Օրբանի և Զելենսկու հեռախոսազրույցը, սակայն ստացել է «ոչ  քաղաքավարի մերժում»։