Ռուսաստանը Դամասկոսից հեռացրել է իր դիվանագիտական ​​անձնակազմին

Ռուսաստանը Դամասկոսից հեռացրել է իր դիվանագիտական ​​ներկայացուցչությունների անձնակազմի մի մասին, ինչպես նաև Բելառուսի, Հյուսիսային Կորեայի և Աբխազիայի դիվանագիտական ​​ներկայացուցչությունների աշխատակիցներին։ Այս մասին հայտնում է ՌԴ ԱԳՆ իրավիճակային ճգնաժամային կենտրոնը։

«Դեկտեմբերի 15-ին ՌԴ ՊՆ օդատիեզերական ուժերի հատուկ չվերթով Խմեյմիմ ավիաբազայից Դամասկոսում ՌԴ արտասահմանյան առաքելությունների անձնակազմի մի մասը տեղափոխվեց Չկալովսկի օդանավակայան։ Տարհանվել են նաև Բելառուսի, Հյուսիսային Կորեայի և Աբխազիայի դիվանագիտական ​​ներկայացուցչությունների աշխատակիցները»,- ասվում է հաղորդագրության մեջ։

Այտ կապակցությամբ մանրամասներ ՌԴ ԱԳՆ-ն չի ներկայացրել, բայց հաղորդագրության մեջ նշվում է, որ Դամասկոսում ՌԴ դեսպանատան աշխատանքը շարունակվում է։

Սիրիայում Բաշար ալ-Ասադի վարչակարգի տապալումից անմիջապես հետո ՌԴ ԱԳՆ-ն հայտնել է, որ Մոսկվան ուղիղ կապ է հաստատել «Հայաթ Թահրիր ալ-Շամ» իսլամիստական ​​խմբավորման քաղաքական կոմիտեի հետ, որը ղեկավարել է կառավարական ուժերի վրա հարձակումը: Ի թիվս այլ բաների, ինչպես նշվում է, ՌԴ դեսպանատան դիվանագետները հանդիպել են խմբի ներկայացուցիչների հետ և քննարկել Սիրիայում դիվանագիտական ​​առաքելության և ՌԴ քաղաքացիների անվտանգության հարցեր։

Bloomberg-ը, հղում անելով աղբյուրներին, հայտնում է, որ Ռուսաստանը մոտ է Սիրիայի նոր իշխանությունների հետ համաձայնության գալ Սիրիայում իր երկու ռազմաբազաների՝ Լաթաքիայի նահանգի Խմեյմիմ ավիաբազայի և Միջերկրական ծովի ափին գտնվող Տարտուս ռազմածովային բազայի պահպանման վերաբերյալ։