Սիրիայի նախագահ Բաշար ալ-Ասադը կարող էր զոհվել ավիավթարի հետևանքով. Reuters

Մեծ է հավանականությունը, որ Սիրիայի նախագահ Բաշար ալ-Ասադը կարող էր զոհվել ավիավթարի հետևանքով, Reuters-ին հայտնել են սիրիական աղբյուրները։

Նրանց խոսքով՝ դա կարող էր տեղի ունենալ այն բանից հետո, երբ նրա ինքնաթիռը օդ է բարձրացել Դամասկոսի օդանավակայանից։ Flightradar24-ի փոխանցմամբ՝ ինքնաթիռը հանկարծակի անհետացել է ռադարներից։ Հրապարակման զրուցակիցներից մեկը ենթադրել է, որ ինքնաթիռը խոցվել է։

Սիրիայի վարչապետն ավելի վաղ հայտարարել էր, որ ոչինչ չգիտի Ասադի գտնվելու վայրի մասին։ Վերջին անգամ նրանք շփվել են նախորդ օրը։

Իսրայելցի լրագրող Բարաք Ռավիդը, հղում անելով իսրայելական կառավարության աղբյուրներին, հայտնում է, որ Բաշար ալ-Ասադը կեսգիշերին մոտ լքել է Դամասկոսը և թռչել Սիրիայում ռուսական բազա։ Ենթադրվում էր, որ այնտեղից նա կմեկնի Մոսկվա։ ԱՄՆ-ը նույնպես կարծում է, որ Ասադը ծրագրել է փախնել Մոսկվա։