Գալուզինը` ՀՀ-ի և ՌԴ-ի հարաբերությունների մասին

Ռուսաստանը հավատարիմ է Հայաստանի հետ պայմանավորվածությունների ողջ շրջանակին և չի հրաժարվում ռազմաքաղաքական ոլորտում իր պարտավորություններից։ Այս մասին Ռուսաստան-Հայաստան հասարակական ֆորումի ժամանակ հայտարարել է Ռուսաստանի փոխարտգործնախարար Միխայիլ Գալուզինը։

«Մոսկվան հավատարիմ է եղել և մնում է միության շրջանակներում բոլոր պայմանավորվածություններին, ինչպես երկկողմ մակարդակով, այնպես էլ եվրասիական տարածքում: Մենք չենք հրաժարվում մեր դաշնակիցների հանդեպ մեր պարտավորություններից, այդ թվում՝ ռազմաքաղաքական ոլորտում»,- ընդգծել է Գալուզինը։

Գալուզինի խոսքով՝ Ռուսաստանի և Հայաստանի ընդհանուր պատմության մեջ կան փառահեղ էջեր, և, առաջին հերթին, հաղթանակն է՝ Հայրենական մեծ պատերազմում։ 

«Երբ գալիս եմ Երևան, հպարտություն եմ ապրում` տեսնելով Իսակովի և Բաղրամյան պողոտաները։ Մեր ընդհանուր պատմությունը մեր աչքի առաջ է, մեր սրտերում և հիշողության մեջ: Վստահ եմ, որ ԵԱՏՄ-ի, ԱՊՀ-ի, ՀԱՊԿ-ի բարեկամների և դաշնակիցների հետ հաջորդ տարի նշելու ենք Մեծ հաղթանակի 80-ամյակը»,- ասել է Գալուզինը: