ՏԵՍԱՆՅՈՒԹ. Հարձակվել են Կալուգայի վրա. 8 ԱԹՍ է ոչնչացվել
Կիևը հայտարարել է ՌԴ-ի Կալուգա քաղաքում գտնվող ռազմական գործարանին հարվածելու մասին: Ռուսական կողմի տվյալներով՝ ութ անօդաչու թռչող սարք է ոչնչացվել Կալուգայի շրջանի տարածքում։
Ուկրաինական անօդաչու թռչող սարքերը հարձակվել են Կալուգայում գտնվող «Թայֆուն» ռազմարդյունաբերական գործարանի վրա։ Այս մասին երկուշաբթի՝ նոյեմբերի 25-ի, հայտարարել է Ուկրաինայի Ազգային անվտանգության և պաշտպանության խորհրդի ապատեղեկատվության հակազդման կենտրոնի ղեկավար Անդրեյ Կովալենկոն։
«Թայֆուն» գործարանը, որը մտնում է ռուսական ռազմարդյունաբերական համալիրի մեջ, նույնպես հարձակման է ենթարկվել Կալուգայում»,- գրել է Կովալենկոն Telegram-ում։ Նրա գրառումը տարածել են ուկրաինական մի շարք լրատվամիջոցներ։
Կալուգայի շրջանի նահանգապետ Վլադիսլավ Շապշան նոյեմբերի 25-ի առավոտյան Telegram-ում գրել է, որ «գիշերը Կալուգայի մատույցներում հակաօդային պաշտպանության ուժերը ոչնչացրել են 3 անօդաչու թռչող սարք»։
Հրդեհ է բռնկվել այն վայրում, որտեղ անօդաչու թռչող սարքի բեկորներն ընկել են արդյունաբերական ձեռնարկության տարածքում, ըստ նախնական տեղեկությունների, տուժածներ չկան, և տեղում աշխատում է օպերատիվ խումբը:
Ժամը 4.30-ի սահմաններում Շապշան հայտնել է, որ արդյունաբերական ձեռնարկության տարածքում բռնկված հրդեհը մարվել է։ «Ընդհանուր առմամբ, հակաօդային պաշտպանության ուժերը մեկ գիշերվա ընթացքում ոչնչացրել են 8 անօդաչու թռչող սարք»,- հավելել է պաշտոնյան։
