Անպատասխանատվության բացառիկ դրսևորում է. Փաշինյան
Հանրայինի եթերում հարցազրույցի ժամանակ վարչապետ Նիկոլ Փաշինյանը պատասխանեց Գյումրիում ստեղծված քաղաքական իրավիճակին: Անդրադառնալով «Բալասանյան» դաշինքի կողմից մանդատների վայր դնելուն՝ Նիկոլ Փաշինյանը ասաց, որ կենտրոնական իշխանությունը որոշ հարցերի լուծում արդեն տվել է:
Սակայն ընդհանուր առմամբ, ըստ Փաշինյանի, Գյումրիում իրավիճակը կարգավորելու ճանապարհը ընտրություններ անցկացնելն է. «Այստեղ իրավական առումով խնդիրներ կան: Օրենսդրական փոփոխություններ պետք է տեղի ունենան: Մեծ հաշվով՝ մեր խնդիրը հետևյալն է: Մենք պետք է գյումրեցուն հնարավորություն տանք, որ ինքն իր քաղաքապետին ընտրի: Մյուս կողմից՝ ես չեմ կարող տեղի ունեցածը մեկնաբանել այլ կերպ, քան անպատասխանատվության բացառիկ դրսևորում»,– ասել է նա:
«Բոլոր այն շահարկումները, թե կառավարությունը որևէ մեկին որևէ ձևով ճնշել է, որ նա ինչ–որ գործողություն անի, ինչ–որ գործողություն, չանի, դա անհեթեթություն է: Ինչ վերաբերում է քրեական գործերին, կառավարութունը ընդհանրապես կապ չունի քրեական գործերի հետ: Եթե կա փաստ, կա քրեական գործ, չկա փաստ, չկա քրեական գործ»,– ասել է նա:
