Փաշինյանը՝ աղմկահարույց պաշտոնանկությունների մասին

Կան որոշակի հարցեր, որոնք բարձրացվել են 2018-ից և մինչև օրս էլ, այդ հարցերը ավելի արդյունավետ հասցեագրման անհրաժեշտություն ունեն: 

Այս մասին Հանրայինի եթերում հարցազրույցում ասել է վարչապետ Նիկոլ Փաշինյանը՝ անդրադառնալով վերջին աղմկահարույց պաշտոնանկություններին:

«Պաշտոնանկությունները ոչ թե անձնավորված են, այլ ավելի շատ համակարգերի հետ են կապված: Դրանք իրենց բնույթով ոչ թե կոնֆլիկտային են, այլ՝ աշխատանքային»,– ասել է նա:

Միևնույն ժամանակ, Փաշինյանը ասել է, որ աշխատանքից ազատված պաշտոնյաներից բոլորը իրենց հերթին արել են «համակարգային շատ լուրջ փոփոխություններ»: Իր խոսքով՝ այդ առումով նրանք «լավ են աշխատել»:

«Ղեկավարը մի կողմից պետք է առաջնորդի և այդ առումով լինի համակարգի մաս, բայց մյուս կողմից, պետք է տարանջատվի համակարգից, որպեսզի համակարգը տեսնի կողքից» ,– ընդգծել է նա: