Ռուսաստանն այսօր հաղթել է Վրաստանում. Վլադիմիր Զելենսկի

Ուկրաինայի նախագահ Վլադիմիր Զելենսկիի կարծիքով Ռուսաստանն այսօր հաղթել է Վրաստանում, քանի որ երկիրն ընտրել է Ռուսաստանի Դաշնության հետ բարեկամությունը, այլ ոչ թե դեպի Եվրամիության հետ ուղին: Ըստ «Европейская правда»-ի՝ դրա մասին սկանդինավյան երկրների առաջատար լրատվամիջոցների ներկայացուցիչների հետ հարցազրույցում հայտարարել է Զելենսկին։

Նրա համոզմամբ՝ այսօր Ռուսաստանը Վրաստանում հաղթել է նախ՝ տարածքի մի մասը գրավելով, իսկ դրանից հետո՝ փոխելով այդ երկրի քաղաքականությունն ու իշխանությունը։

«Հիմա էլ այնտեղ ռուսամետ իշխանություն է, ռուսական դիրքորոշումներ։ Պուտինի դեմ պատժամիջոցներ չկան, Վրաստանում շատ ռուսներ կան: Նրանց ընտրությունը Ռուսաստանի հետ բարեկամությունն է, նրանց ընտրությունը ԵՄ-ին չանդամակցելն է։ Նրանք փոխեցին իրենց դիրքորոշումը: Ռուսաստանը այսօր հաղթեց: Նրանք խլեցին Վրաստանի ազատությունը»,-հայտարարել է Ուկրաինայի նախագահը։

Մեկնաբանելով Մոլդովայում ստեղծված իրավիճակը՝ Զելենսկին նշել է, որ Ռուսաստանը «շարժվում է նույն ուղղությամբ»։

«Կտեսնեք, Ռուսաստանը նույն ճանապարհով է գնում: Եթե ​​Արևմուտքը  շարունակի այս հռետորաբանությունը, ապա մեկ-երկու տարում Մոլդովան կկորցնի»,- վստահեցրել է Ուկրաինայի նախագահը։

Միաժամանակ Զելենսկին շեշտել է Ուկրաինայի և Վրաստանի միջև եղած տարբերությունը։

«Մենք ավելի շատ ենք: Սա է մեր և Վրաստանի տարբերությունը: Մենք շատ ավելի մեծ ենք: Ունենք ավելի մեծ բնակչություն, ավելի շատ տղամարդիկ, ովքեր չեն ցանկացել ռուս լինել»,- եզրափակել է նախագահը։