Ոչ ոք չի երաշխավորում, որ միջուկային զենք չի օգտագործվի. Պուտին

Ռուսաստանի նախագահ Վլադիմիր Պուտինը հայտարարել է, որ արևմտյան որոշ վերնախավեր չեն ցանկանում թույլ տալ նոր միջազգային համակարգի ստեղծումը, որը համապատասխանում է մեծամասնության շահերին։ Այս մասին Պուտինը հայտարարել է Սոչիում ընթացող «Վալդայ» միջազգային բանավեճի ակումբի նիստի ժամանակ։

«Այդպիսի կույր հավատը սեփական անպատժելիությանը (արևմտյան երկրների), կարող է համաշխարհային աղետի վերածվել»,– նշել է Պուտինը։

Միջազգային հակամարտություններն ու բախումները հղի են փոխադարձ ոչնչացմամբ, և ոչ ոք երաշխիք չի տալիս, թե միջուկային զենք չի կիրառվի։

«Այդ զենքը գոյություն ունի և անընդհատ կատարելագործվում է, տեխնոլոգիաների զարգացման ֆոնին էլ նոր ձևեր է ստանում։ Նմանատիպ զենք ունեցողների ակումբն էլ ընդլայնվում է։ Ոչ ոք չի երաշխավորում, որ սպառնալիքների հոսքի և իրավական ու բարոյական նորմերի վերջնական ոչնչացման դեպքում այն չի գործի»,– ասաց Պուտինը։

Նա նաև կարծում է, որ Ռուսաստանին` միջուկային զենքի ամենամեծ զինանոց ունեցող երկրին, ռազմավարական պարտության մատնելու Արևմուտքի կոչերը ցույց են տալիս որոշ քաղաքական գործիչների անսահման արկածախնդրությունը։