74-ամյա տղամարդը ձերբակալվել է` Թրամփի հասցեին սպանության սպառնալիքներ հնչեցնելու մեղադրանքով

ԱՄՆ-ում ձերբակալել են մի տղամարդու, ով կասկածվում է նախագահի հանրապետական ​​թեկնածու և երկրի նախկին առաջնորդ Դոնալդ Թրամփի հասցեին սպանության սպառնալիքներ հնչեցնելու մեջ, հայտնում է WTAJ հեռուստաալիքը։

74-ամյա Փոլ Գավենոսիսին մեղադրանք է առաջադրվել ահաբեկչական սպառնալիքներ հնչեցնելու և խուլիգանության մեջ` այն հայտարարություններից հետո, որոնք նա, իբր, արել է Թրամփի հասցեին` կայանման տոմս ստանալու ժամանակ:

Նշվում է, որ վկան մտահոգություն է հայտնել թե Փենսիլվանիայում հոկտեմբերի 26-ին Թրամփի նախընտրական հանրահավաքի ժամանակ  կասկածյալը կարող էր մոտենալ երկրի նախկին առաջնորդին և վտանգի ենթարկել իր կյանքը:

Հեռուստաալիքի տվյալներով՝ Փենսիլվանիայի ոստիկանությունն ու ԱՄՆ Գաղտնի ծառայությունն արդեն հարցաքննել են ձերբակալվածին, ով նախ նրանց ասել է, որ սպառնալիքներն արվել են կատակով, բայց հետո խոստովանել է, որ կարող է փորձել սպանել Թրամփին։

Հիշեցնենք, որ Թրամփը 2024 թվականի իր քարոզարշավի ընթացքում բախվել է երկու մահափորձի։ Հուլիսի 13-ին Փենսիլվանիայում մահափորձի ժամանակ Թրամփը վիրավորվել էր ականջից, սպանվել էր հանդիսատեսներից մեկը, ևս երկուսը վիրավորվել էին։ Ինքնաձիգով կասկածյալը թաքնվել է դեպքի վայրից 100 մետր հեռավորության վրա գտնվող արդյունաբերական շենքի տանիքում և վերացվել Գաղտնի ծառայության դիպուկահարի կողմից։

Թրամփի դեմ երկրորդ մահափորձը տեղի է ունեցել սեպտեմբերի 15-ին Ֆլորիդայի նրա գոլֆի ակումբում։ Իրավապահ մարմինների տվյալներով՝ Գաղտնի ծառայության աշխատակիցները կրակ են բացել ներխուժողի վրա, ով թաքնվել է թփերի մեջ։ Տղամարդը փախել է և փորձել է փախչել մեքենայով, սակայն բերման է ենթարկվել։