Իսրայելը ահաբեկչական է հայտարարել «Հեզբոլլահը» ֆինանսավորող վարկային կազմակերպությանը

Իսրայելի պաշտպանության նախարար Յոավ Գալանտը ահաբեկչական կազմակերպության կարգավիճակ է շնորհել լիբանանյան ֆինանսական և վարկային «Ալ-Քարդ Ալ Հասան» կազմակերպությանը, որը հովանավորում է Լիբանանում շիայական «Հեզբոլլահ» շարժման գործունեությունը և օգնություն է տրամադրում նրա աջակիցներին։ Այս մասին հայտնում է ռազմական գերատեսչության մամուլի ծառայությունը։

Նախարարը հրաման է ստորագրել՝ «Ալ-Քարդ Ալ-Հասանն» Իսրայելի ահաբեկչական կազմակերպությունների ցուցակում ներառելու մասին։

«Այս ճանաչումը իսրայելական պաշտպանական կառույցների կողմից «Հեզբոլլահի» և այլ ահաբեկչական կազմակերպությունների տնտեսական ռեսուրսների դեմ իրականացվող լայնածավալ արշավի մի մասն է», - ասվում է հայտարարության մեջ։

ՊՆ–ից հայտնել են, որ այս ասոցիացիան ցուցակագրելու որոշումը հիմնված է հետախուզության, բանակի գլխավոր շտաբի և ընդհանուր անվտանգության ծառայությունների առաջարկությունների վրա: