Հայաստանի հավաքականը չի անցկացնի նախախաղային մարզում Հս. Մակեդոնիայի դեմ հանդիպումից առաջ

Հաշվի առնելով Ազգերի լիգայի խմբային փուլի երրորդ տուրի Ֆարերյան կղզիներ - Հայաստան հանդիպումից (2:2) հետո երկար թռիչքը դեպի Երևան՝ Հայաստանի ազգային հավաքականի մարզչական շտաբը որոշել է չեղարկել Հայաստան - Հյուսիսային Մակեդոնիա հանդիպումից առաջ նախատեսված նախախաղային մարզումը Վազգեն Սարգսյանի անվան «Հանրապետական» ստադիոնում: Այս մասին հաղորդում է ՀՖՖ-ի կայքը: 

Փոխարենը հավաքականը Ֆուտբոլի ակադեմիայում կանցկացնի վերականգնողական մարզում, որը փակ կլինի մեդիայի ներկայացուցիչների համար։

Հայաստանի հավաքականի գլխավոր մարզիչ Ալեքսանդր Պետրակովի և թիմի ֆուտբոլիստներից մեկի նախախաղային մամուլի ասուլիսը տեղի կուենա Վազգեն Սարգսյանի անվան «Հանրապետական» ստադիոնի մամուլի ասուլիսների սրահում հոկտեմբերի 12-ին՝ ժամը 17:00-ին, և կհեռարձակվի սոցցանցերում ՀՖՖ պաշտոնական էջերում։

Ազգերի լիգայի չորրորդ տուրի Հայաստան - Հյուսիսային Մակեդոնիա հանդիպումը տեղի կունենա հոկտեմբերի 13-ին եւ կմեկնարկի 20:00-ին։