Ռուսաստանը Չինաստանում գործարկել է հեռահար հարվածային անօդաչու թռչող սարքերի մշակման և արտադրության ծրագիր, որոնք նախատեսվում է օգտագործել Ուկրաինայի պատերազմում։ Այս մասին հայտնում է Reuters գործակալությունը՝ հղում կատարելով եվրոպական հետախուզության աղբյուրներին և համապատասխան փաստաթղթերին, գրում է Meduza–ն։

Գործակալության տվյալներով՝ Իժևսկի «Կուպոլ» էլեկտրամեխանիկական գործարանը տեղացի մասնագետների մասնակցությամբ Չինաստանում անցկացրել է Harpy-3 անօդաչու թռչող սարքի նոր մոդելի թռիչքային փորձարկումներ։ Reuters-ը վկայակոչում է այն զեկույցը, որը «Կուպոլը՞ ուղարկել է Ռուսաստանի պաշտպանության նախարարություն այս տարվա սկզբին։ Ավելի ուշ գործարանը գերատեսչությանը հայտնեց, որ կարող է մեծ քանակությամբ անօդաչու թռչող սարքեր արտադրել, այդ թվում՝ Harpy 3-ը Չինաստանի գործարանում՝ ռուս-ուկրաինական պատերազմում օգտագործելու համար:

Reuters-ի ձեռք բերած զեկույցների համաձայն՝ Harpy-3 անօդաչու թռչող սարքերը կարող են անցնել մոտ երկու հազար կիլոմետր տարածություն՝ 50 կիլոգրամ օգտակար բեռնվածքով։ Չինաստանում արտադրված Harpy-3-ի և որոշ այլ անօդաչու թռչող սարքերի նմուշները չինացի փորձագետների ներգրավմամբ հետագա փորձարկման համար առաքվել են Ռուսաստան։

Փաստաթղթերում, ինչպես նշում է Reuters-ը, չինացի մասնագետների անունները նշված չեն։ Չինաստանի արտաքին գործերի նախարարությունը գործակալությանը հայտնել է, որ տեղյակ չէ նման նախագծի մասին։ Գերատեսչությունում հավելել են, որ Չինաստանը խիստ վերահսկողություն է իրականացնում անօդաչու թռչող սարքերի արտահանման հարցում։