Ալեքսանդր Պետրակովի պատասխանատու հայտարարությունը
Ժամեր անց ֆուտբոլի Հայաստանի ազգային հավաքականը պայքարը կսկսի Ազգերի լիգայի C դիվիզիոնի խմբային փուլում, Վազգեն Սարգսյանի անվան «Հանրապետական» մարզադաշտում մրցելով Լատվիայի հետ:
«Մենք երազում ենք նվաճել աշխարհի առաջնության ուղեգիր, ինչպես դա արեցին վրացիները: Ազգերի լիգան մեր պես փոքր երկրների հավաքականներին հնարավորություն է տալիս հայտնվելու մեծ մրցաշարերում: Երեկ մեզ այցելեց ՀՖՖ-ի նախագահը և մենք խոսեցինք նպատակների մասին: Այո, մեր նպատակը հաղթանակն է Ազգերի լիգայում և աշխարհի առաջնության եզրափակիչ փուլի ուղեգիր նվաճելը»,- նախախաղային մամուլի ասուլիսի ժամանակ երեկ հայտարարեց Հայաստանի ազգային հավաքականի գլխավոր մարզիչ Ալեքսանդր Պետրկովը:
Նշենք, որ Ազգերի լիգայի А, B և C դիվիզիոններում, ենթախմբերում հաղթող ճանաչված և լավագույն արդյունք ցույց տված 3 հավաքականներ կնվաճեն աշխարհի առաջնության փլեյ-օֆֆի ուղեգիր: Հաշվի առնելով Պետրակովի հարուստ փորձն ու բազմիցս հնչեցրած սթափ գնահատականները կարող ենք եզրակացնել, որ ուկրաինացի մասնագետն իսկապես հավատում մեր ազգային թիմի հաջողությանը Ազգերի լիգայում:
Երկրպագուների շարքերում շատ է խոսվում Ազգերի լիգայի մեկնարկելիք խաղարկությունը միտումնավոր ձախողելու և C վիդիզիոնում տեղը պահպանելու մասին: Այս հարթակում մնալու պարագայում Հայաստանը լավ հնարավորություն կստանա Ազգերի լիգայի հաջորդ շրջափուլում պայքարելու Եվրոպայի առաջնության եզրափակիչ փուլի ուղագրի համար: Ազգերի լիգայի C դիվիզիոնից Եվրոպայի առաջնությունում են հայտնվել Վրաստանը և Հյուսիսային Մակեդոնիան: Այո, Հայաստանը կարող է հաղթել C Դիվիզիոնի ենթախմբում բարձրանալ B դիվիզիոն, սակայն աշխարհի առաջնության փլեյ-օֆֆի ուղագիր չնվաճել:
Իսպանացի մասնագետ Խոակին Կապառոսի գլխավորությամբ Հայաստանը հաղթել էր C դիվիզիոնում և հայտնվել B դիվիզիոնում: Այստեղ արդեն Եվրոպայի առաջնության ուղեգիր նվաճելն իրատեսական չէր և մեր ազգային հավաքականը ձախողվեց: Ումանք մինչ օրս քննադատում են Կապառոսին, կարծիք հայտնելով, որ իսպանացի մասնագետը պետք է չբարձրացներ թիմին B դիվիզիոն:
Ինչևէ, Պետրակովի պայմանագիրը ՀՖՖ-ի հետ ավարտվելու է նոյեմբերին, երբ ավարտվի նաև Ազգերի լիգան: Հավանականությունը մեծ է, որ հավաքականի առջև դրված խնդիրը չլուծելու դեպքում ՀՖՖ-ն չերկարաձգի պայմանագիրը ուկրաինացի մասնագետի հետ: Պետրակովի երեկվա պատասխանատու հայտարարությունը վկայում է, որ մեր մարզիչը կփորձի անել հնարավորինը և անհնարին` Ազգերի լիգայում մեծ հաջողության հասնելու և Հայաստանի հավաքականում աշխատանքը շարունակելու համար:
