Սերբիայի նախագահ Ալեքսանդր Վուչիչը ՆԳՆ-ին կոչ է արել պատրաստվել ցանկացած հնարավոր սցենարի և ապահովել բոլոր անհրաժեշտ պահուստները, քանի որ ակնկալում է Եվրոպայում անվտանգության ոլորտում իրավիճակի վատթարացում մինչև տարեվերջ:

Կիրակի օրը Վուչիչը և փոխվարչապետ և ներքին գործերի նախարար Իվիցա Դաչիչը Սերբիայի ներքին գործերի նախարարության օրը կայացած արարողության ժամանակ լավագույն աշխատակիցների պարգևատրում են անցկացրել:

«Ապրում ենք մի աշխարհում, որտեղ չկա անվտանգություն, կայունություն, և հնարավոր չէ հեշտությամբ դիտարկել այն, ինչ տեղի կունենա մինչև այս տարվա վերջ, առավել ևս շատ բան պլանավորել ապագայի համար։ Այդ պատճառով մենք պետք է մտածենք մեր երկրի մասին եւ լավ պատրաստվենք յուրաքանչյուր հնարավոր սցենարին, լավ հասկանանք, թե ինչ է կատարվում աշխարհում, Եվրոպայում, եւ որտեղ է այդ ամենի մեջ գտնվում Սերբիան», - հայտարարել է Վուչիչը հավաքվածներին։

Սերբ առաջնորդի խոսքով ՝ ՆԳՆ աշխատանքն էլ ավելի կարևոր կդառնա, քանի որ քաղաքացիների անվտանգությունն առաջնային է և առանցքային նշանակություն ունի:

«Պատրաստ եղեք ավելի ծանր ժամանակահատվածի, ոչ թե այն պատճառով, որ Սերբիան ծանր կամ վատ վիճակում է, ընդհակառակը։ Քանի որ գիտեմ, թե ինչ է լինելու աշխարհում, գիտեմ, որ իրավիճակը մեզ մոտ էլ շատ ավելի ծանր է լինելու, ուստի կարևոր է ապահովել բոլոր այն ռեզերվները, որոնք կան և պատրաստվել այդ շրջանին։ Որքան էլ դժվար լինի Եվրոպայում եւ աշխարհում, Սերբական հողի յուրաքանչյուր թիզ պետք է անվտանգ լինի», - ընդգծել է Վուչիչը։

Ավելի վաղ Սերբիայի նախագահը բազմիցս մտահոգություն էր հայտնել, որ Ուկրաինայի հակամարտությունը կվերածվի գլոբալ զինված դիմակայության արդեն այս տարվա աշնանը՝ կողմերի անհաշտ դիրքորոշումների պատճառով: