«Կրոկուս Սիթի Հոլ»–ում տեղի ունեցած ահաբեկչության ժամանակ համերգասրահի հրդեհային ելքերը փակ են եղել. դատարան

Անվտանգության պահանջներին չհամապատասխանող ծառայությունների մատուցման քրեական գործը, որը հետաքննվում է մերձմոսկովյան Crocus City Hall համերգասրահում տեղի ունեցած ահաբեկչության դեպքի հետ միասին, կապված է շենքի անվտանգության կազմակերպման հետ։ Այս մասին հայտնի է դառնում Մոսկվայի Բասմանի դատարանի մայիսի 17-ի որոշումից, որով  ահաբեկչության գործով չորս մեղադրյալների կալանքի ժամկետը երկարաձգվում է:

«Կոմերսանտ» թերթն ավելի վաղ գրել էր, որ անվտանգության պահանջներին չհամապատասխանող ծառայություններ մատուցելու գործով բերման են ենթարկվել համերգասրահի երկու աշխատակից, որոնց մեղադրանք է առաջադրվել, այնուհետև նրանք ազատ են արձակվել երկրից չհեռանալու պայմանով: Հրապարակման մեջ ասվում է, որ այս ամբաստանյալների դեմ ներկայացված պահանջները «հանգում են նրան, որ դահլիճից հրդեհային ելքերը փակ են»։

Մարտի 22-ին մի քանի զինված անձինք ներխուժել են Crocus City Hall համերգասրահ և կրակ բացել այցելուների և անձնակազմի վրա։ Շենքում հրդեհ է բռնկվել: Ահաբեկչության զոհ է դարձել 144 մարդ։ Ռուսաստանի Քննչական կոմիտեն հետաքննում է ահաբեկչության քրեական գործը։

Մայիսին ՌԴ ԱԴԾ տնօրեն Ալեքսանդր Բորտնիկովը հայտնել էր, որ քրեական գործով կալանավորվել է ավելի քան 20 մարդ, այդ թվում՝ անմիջական հանցագործներն ու հանցակիցները։