Ուկրաինան առաջին անգամ օդային գրոհ է իրականացրել՝ կիրառելով ցամաքային մարտական ռոբոտ

Ուկրաինական զինված ուժերն առաջին անգամ մարտական պայմաններում կիրառել են նոր մարտավարություն, որի շրջանակում ծանր անօդաչու թռչող սարքը ռազմաճակատի խորքում տեղափոխել և իջեցրել է ցամաքային ռոբոտացված համալիր։ Այս մասին հայտնում է Forbes-ը։

Ըստ հրապարակման՝ ծանր դրոնը մարտական գոտի է հասցրել ARK-1 անվանումով ցամաքային ռոբոտը, որն իջեցումից հետո ինքնուրույն շարունակել է առաջադրանքի կատարումը։ Այս մոտեցումը մասնագետներն անվանում են «պարկավոր» մարտավարություն, երբ մեկ անօդաչու համակարգ տեղափոխում և գործարկում է մեկ այլ ռոբոտացված հարթակ։

Նշվում է, որ նման մեթոդը լուծում է ցամաքային ռոբոտների հիմնական խնդիրները՝ սահմանափակ արագությունը, տեղանքում խրվելու վտանգը և մինչև թիրախ հասնելը ոչնչացվելու բարձր հավանականությունը։ Օդային տեղափոխման շնորհիվ դրանք կարող են արագ և ավելի անվտանգ հասնել առաջադրանքի վայր։

Forbes-ի տվյալներով՝ սա առաջին հայտնի դեպքն է, երբ մեկ անօդաչու թռչող սարք մարտական պայմաններում տեղափոխել և կիրառել է մեկ այլ ռոբոտացված համալիր։ Նման տեխնոլոգիաներ նախկինում փորձարկվել էին նաև ԱՄՆ-ում, սակայն դրանք մարտական կիրառություն չէին ստացել։

Հրապարակման համաձայն՝ այս մարտավարության հիմնական նպատակն է նվազեցնել անձնակազմի ռիսկերը և ընդլայնել ռոբոտացված համակարգերի կիրառման հնարավորությունները մարտի դաշտում։