«Ուժեղ Հայաստանը» դեռ չի բացում՝ որ հանձնաժողովներն է ընտրելու. Տիգրան Աբրահամյան

«Ուժեղ Հայաստան» խմբակցությունն արդեն որոշակի պատկերացումներ ունի նախընտրելի հանձնաժողովների վերաբերյալ, սակայն մարտավարական նկատառումներով դեռ չի հանրայնացնում դրանք։

Օգոստոսի 4–ին Ազգային ժողովում լրագրողների հետ զրույցում այս մասին հայտնել է «Ուժեղ Հայաստան» խմբակցության պատգամավոր Տիգրան Աբրահամյանը։ Նրա խոսքով՝ այժմ տվյալների հրապարակումը կարող է ազդել ընտրության ընթացքի վրա, քանի որ առաջին երկու հանձնաժողովների ընտրությունը կատարում է իշխող ուժը։ Պատգամավորը հավելել է, որ իրենք կանգ են առնելու այնպիսի հանձնաժողովների վրա, որոնք հնարավորություն կտան առավել արդյունավետ իրականացնել խորհրդարանական վերահսկողություն։

Հարկ է նշել, որ Դոնթի բանաձևի համաձայն՝ ԱԺ հանձնաժողովների նախագահների և փոխնախագահների պաշտոնների մի մասը հատկացվում է ընդդիմադիր խմբակցություններին։