Դեղագործների ամենամեծ ակցիան վերջին 10 տարվա ընթացքում․ Ֆրանսիայում դեղատների մեծ մասը փակ է

Ֆրանսիայում դեղատների 75%-ից 90%-ը փակ է հինգշաբթի դեղագործների համընդհանուր գործադուլի պատճառով: Այս մասին հայտնում է Franceinfo-ն։ 

Գործադուլի նախազգուշացումը իշխանություններին ուղարկվել է երկու սեկտորային արհմիությունների՝ Դեղագործների ֆեդերացիայի (FSPF) և Միացյալ դեղագործների միության (USPO) կողմից: Նրանց տվյալներով՝ մայիսի 30-ին Ֆրանսիայի 20 500 դեղատներից 15-18 հազարը կփակվեն։

Նշվում է, որ գիշերային հերթապահ դեղատները բաց են մնալու, ակցիան կազդի միայն ցերեկային ժամերի վրա։ Ինչպես նշում է ռադիոկայանը, սա դեղագործների ամենամեծ ակցիան է վերջին 10 տարվա ընթացքում։

Նրանք կառավարությունից պահանջում են դեղերի դեֆիցիտի դեմ պայքարի ծրագիր, ինչպես նաև բարձր աշխատավարձ:

Նշվում է, որ դեղագործները դատապարտում են պետության կողմից ծայրահեղ ցածր աջակցությունը. 2023-2027 թվականներին յուրաքանչյուր դեղատան համար լրացուցիչ հատկացվում է ընդամենը 5500 եվրո, մինչդեռ ոլորտի փորձագետները պահանջում են մոտ 20 հազար եվրո մեկ դեղատան համար։