Բայրամովը խոսել է Տավուշի չորս գյուղերի մասին

Ադրբեջանի արտգործնախարար Ջեյհուն Բայրամովը խոսել է Տավուշի չորս գյուղերի մասին՝ նշելով, թե «գյուղերի վերադարձը դրական ներդրում ունի հարաբերությունների կարգավորման գործընթացում»։ Այս մասին նա ասել է Պակիստանի գործընկերոջ հետ համատեղ մամուլի ասուլիսի ժամանակ։ 

Բայրամովի խոսքով՝ այսօրվա հանդիպմանը պակիստանցի գործընկերոջը ներկայացրել է տարածաշրջանում հետհակամարտային իրավիճակը։

Նա նշել է, որ Պակիստանի ԱԳՆ ղեկավարին տեղեկացրել է նաև Տավուշի չորս գյուղերի հատվածում վերականգնողական աշխատանքների մասին. «Ես նշել եմ, որ ականների երկարաժամկետ խնդիրը խոչընդոտում է մեր ջանքերին»,-ասել է Բայրամովը։

Ադրբեջանի ԱԳ նախարարը նշել է, որ հայ-ադրբեջանական սահմանի որոշակի հատվածի սահմանազատումը և վերջերս ձեռք բերված պայմանավորվածությունը դրական ներդրում ունի կարգավորման գործընթացում։

«Ադրբեջանը հավատարիմ է խաղաղ գործընթացին, և մենք հուսով ենք, որ այն դրական կլինի ընդհանուր տարածաշրջանի անվտանգության և բարգավաճման համար»,- ընդգծել է ադրբեջանցի պաշտոնյան։