Բագրատ Սրբազանը խոսել է Իրանի հետ հարաբերությունների մասին

Իրանը Հայաստանի Հանրապետության համար շատ բարեկամ երկիր է, և պետք է հայ-իրանական հարաբերություններն էլ ավելի խորացնել ու զարգացնել։ Այս մասին Իրանի դեսպանատանը բացված սգո մատյանում ցավակցական գրառում կատարելուց հետո լրագրողների հետ ասել է Հայ առաքելական եկեղեցու Տավուշի թեմի առաջնորդ, «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը։

Նա ընդգծել է, որ հարաբերությունները խորացնելու անհրաժեշտությունն ու կարիքը կա, և ինքը գիտի, թե ինչպես է պետք անել։

Սրբազանը նշել է՝ Իրանի հանդեպ իր ունեցած հարազատության զգացումն անձնական փորձից է նաև, քանի որ իր ընտանիքն այնտեղից է Հայաստան ներգաղթել։

Նրա խոսքով՝ պետք է չեզոքացվեն այն խնդիրները, որոնք կարող են որևէ կերպ սպառնալիք դառնալ հայ-իրանական հարաբերությունների համար։

«Մենք մեծ գնահատանքով պետք է անդրադառնանք Իրանի ռազմաքաղաքական վերնախավի այն հաստատուն հայտարարություններին, որոնք 2020 թվականից հետո մինչև այսօր չեն փոխվել, որոնք առնչվում են Հայաստանի Հանրապետության տարածքային ամբողջականությանը, դրանից բխած անվտանգային խնդիրներին»,- ասել է Բագրատ Արբազանը։