ՏԵՍԱՆՅՈՒԹ․ Ես թուրքին չեմ ծախվում. Կիրանցի բնակիչը՝ տան փոխհատուցման առաջարկի մասին

Նիկոլին երբ հանդիպեցինք, մեզ ասեցին՝ եթե տունը ընկնի Ադրբեջանի տարածք, մենք ձեզ կփոխհատուցենք, տուն կտանք: Ես էլ ասել եմ՝ ես թուրքի վրա չեմ ծախվում: Հայաստան-Վրաստան միջպետական ճանապարհի փակ հատվածում NEWS.am-ի հետ զրույցում ասել է Կիրանց գյուղի բնակիչ Գոհարը, որի տունը սահմանազատման և սահմանագծման աշխատանքների արդյունքում հայտնվելու է Ադրբեջանի տարածքում:

«Մենք մարզպետի հետ ենք հանդիպում պահանջում, բայց առավոտից մինչև հիմա ինքը չկա: Թո՛ղ գա, ամբողջ ժողովրդի հետ հանդիպի, եթե մաքուր ա»,-ասել է Կիրանցի բնակիչը՝ նշելով, որ մարզպետը ցանկացել է առանց լրատվամիջոցների ներկայության հանդիպել գյուղացիների հետ:

Հարցին, թե որպես փոխհատուցում ի՞նչ են առաջարկել իրեն, նա ասել է, որ ինչ էլ առաջարկեն, իրեն ոչինչ հարկավոր չէ:

«Ինձ էդ փոխհատուցում բառը մի՛ ասեք, ես խանգարվում եմ: Ես թուրքի վրա չեմ ծախվում: Ես Նիկոլը չեմ, որ թուրքի վրա ծախվեմ»,-հավելել է Կիրանցի բնակչուհին:

Հիշեցնենք, որ շուրջ հինգ ժամ է՝ կիրանցեցիները փակել են Հայաստան-Վրաստան միջպետական ճանապարհի Կիրանցի հատվածը: Նրանք դժգոհում են երեկ հրապարակված սահմանազատման արդյունքներից: