Ցավոք սրտի, մեր մտավախությունները հաստատվեցին. Միխայիլ Գալուզին
Ցավոք սրտի, մեր մտավախությունները հաստատվեցին՝ Հայաստանում ԵՄ դիտորդական առաքելությունը փաստացի վերածվել է կիսապատերազմական արևմտյան գործողության՝ ՆԱՏՕ-ի անդամ երկրների ներգրավմամբ և կասկածելի նպատակներով։ Անձնակազմն արդեն կրկնապատկվել է, նոր հենակետեր են բացվում։ Բոլորովին վերջերս կնքվեց համաձայնագիր ՀՀ-ում ԵՄ ներկայության կարգավիճակի մասին՝ ապահովելով նրան Հայաստանի տարածքում գործելու ազատություն: Այս մասին հայտարարել է ՌԴ փոխարտգործնախարար Միխայիլ Գալուզինը։
«Այն փաստը, որ առաքելությունը հանդիսանում է ԵՄ հիբրիդային պատերազմի գործիք, հաստատում է դրա գաղտնիությունը, հաշվետվողականության բացակայությունը և վերահսկողության բացակայությունը թե՛ Հայաստանի, թե՛ Ադրբեջանի, թե՛ այլ շահագրգիռ երկրների և կառույցների կողմից։ Առաքելությունը բացահայտ սադրիչ գործունեություն է ծավալում, ամբողջությամբ զբաղվում է հակառուսական քարոզչությամբ՝ հայ հասարակության մեջ կեղծ գաղափարներ սերմանելով Եվրամիության՝ որպես Հայաստանի «անվտանգության և բարգավաճման աղբյուրի» մասին։ Ավելին, ԵՄ անդամների գործունեությունը գնալով ստանում է հակաադրբեջանական և հակաիրանական բնույթ»,-ասել է նա։
Խոսելով երկարաժամկետ տարածաշրջանային անվտանգության, կայունության և սոցիալ-տնտեսական զարգացման խնդիրների մասին Գալուզինն ասել է, որ տարածաշրջանը ռազմականացնելու և այնտեղ ԵՄ-ի և ՆԱՏՕ-ի ռազմաքաղաքական ազդեցությունն ընդլայնելու արևմտյան երկրների ծրագրերը լիովին անհամապատասխան են դրանց․ «Հարավային Կովկասի բարգավաճման բանալին ներառական երկխոսությունն է, մասնավորապես «3+3» հարթակի շրջանակներում, ի հայտ եկած խնդիրների հավաքական պատասխանների որոնումը և արտատարածաշրջանային ուժերի աշխարհաքաղաքական թելադրանքին հակազդելը»,-ասել է նա։
Միխայիլ Գալուզինը նաև հավելելէ` ԼՂ-ում ռուս խաղաղապահներն արել են գլխավորը, ինչի մասին չպետք է մոռանալ, նրանք խաղաղություն և կայունություն են բերել հակամարտող տարածաշրջան:
«Խաղաղապահ ուժերը մաքրել են ավելի քան 689 կիլոմետր ճանապարհ, ստուգել 1940 շենք, հայտնաբերել և վնասազերծել 26794 պայթուցիկ առարկա։ Ապահովվել է սոցիալապես նշանակալի 31 օբյեկտների, 40 կիլոմետր կապի գծերի և 20 կիլոմետրանոց գազատարների գործունեությունը։ Խաղաղապահների մասնակցությամբ տեղի բնակչությանը հասցվել է ավելի քան 222 տոննա մարդասիրական օգնություն։ Կազմակերպվել է կալանավորների և ռազմագերիների փոխանակում, 213 մարդ վերադարձվել է, որից 189-ը Հայաստան, 24-ը՝ Ադրբեջան, 15 մարդասիրական և բժշկական գործողություններ են իրականացրել տարածաշրջանի հեռավոր շրջաններում։ Վերականգնվել է 224 տուն, 95 կիլոմետր էլեկտրահաղորդման գիծ, 33 կիլոմետր օպտիկամանրաթելային կապի գծեր, 32 կիլոմետր ջրատար, 42 կիլոմետր գազատար, 36 տրանսֆորմատորային ենթակայան»,-ասել է նա։
Խոսելով Արցախում Ադրբեջանի կողմից վերջին ագրեսիայի մասին Գալուզինը նշել է, որ ռուսական կողմի ջանքերի շնորհիվ, այդ թվում՝ վեց խաղաղապահների կյանքի գնով, հաջողվել է խուսափել քաղաքացիական բնակչության զգալի զոհերից․ «Մեր խաղաղապահները ապաստան են տրամադրել խաղաղ բնակչությանը, հումանիտար օգնություն են հասցրել և կազմակերպել տարհանումներ»,-ասել է ռուս պաշտոնյան։
«Ամփոփելով՝ կցանկանայի ևս մեկ անգամ նշել խաղաղապահ կոնտինգենտի զգալի ներդրումը Հարավային Կովկասում իրավիճակի կայունացման գործում»,-իր խոսքը եզրափակել է Գալուզինը։
