ՏԵՍԱՆՅՈՒԹ․ Վրաստանում լարված իրավիճակ է
Վրաստանի խորհրդարանի շենքի մոտ լարված իրավիճակ է ստեղծվել։ Խորհրդարանի մոտ ձերբակալություններ են սկսվել։
Վրաստանում «Օտարերկրյա ազդեցության թափանցիկության մասին» օրինագծի՝ երրորդ ընթերցմամբ ընդունումից հետո երկրի խորհրդարանի շենքի մոտ լարված իրավիճակ է ստեղծվել:
Վրաստանի օրենսդիր մարմնի շենքում ակտիվացվել է անվտանգության կարմիր մակարդակը։ Նիստը, որի ընթացքում պատգամավորները երրորդ ընթերցմամբ ընդունել են օտարերկրյա գործակալների մասին օրենքը, տեղի է ունեցել բողոքի ակցիաների ֆոնին, որոնց ընթացքում ցուցարարների եւ ոստիկանների միջեւ մի քանի բախումներ են եղել:
Ավելի ուշ ցուցարարները կոտրել են դեպի խորհրդարանի բակ անցումը փակող պատնեշը։ Դրանից հետո ոստիկանները խիստ ձերբակալություններ են սկսել։ Վրաստանի ՆԳՆ-ն բարձրախոսներով հավաքվածներից պահանջում է լքել խորհրդարանի հարակից տարածքը, հակառակ դեպքում կկիրառվեն հատուկ միջոցներ և ջրցան մեքենաներ:
Ցուցարարները, որոնք փակել էին Ռուսթավելու պողոտան, վնասել են խորհրդարանի շենքի մոտ տեղադրված երկաթե արգելապատնեշները: Բախումներ են սկսվել ցուցարարների և ոստիկանների միջև: Իրավապահները սկսել են հատուկ միջոցներ կիրառել:
Ավելի վաղ Վրաստանի խորհրդարանը 84 կողմ, 30 դեմ ձայներով երրորդ ընթերցմամբ ընդունել է «Օտարերկրյա ազդեցության թափանցիկության մասին» օրենքը: Արևմուտքում այն որակել են «հակաարևմտյան»: Ցուցարարները, ընդդիմադիրները և Վրաստանի նախագահը պնդում են՝ այդ նախաձեռնությունը կրկնում է «օտարերկրյա գործակալների» մասին ռուսական օրենքը և նպատակ ունի սահմանափակել արտասահմանյան ֆինանսավորում ստացող ԶԼՄ-ների և հասարակական կազմակերպությունների գործունեությունը:
