Հայտնի է Ֆուչիկի փողոցում զինված միջադեպի մասնակիցներից մի քանիսի ինքնությունը. մանրամասներ
Երևանի Ֆուչիկի փողոցում զինված միջադեպի վարույթով երկու անձի նկատմամբ հետախուզում է հայտարարվել։ Տեղեկությունը հայտնում է ՀՀ քննչական կոմիտեի մամուլի ծառայությունը։
Հայտնել էինք, որ Ֆուչիկի փողոցում մարտի 15–ին՝ ժամը 00:18–ի սահմաններում, լսվել են կրակոցներ, պայթուցիկ է նետվել, որի հետևանքով եղել են վիրավորում ստացողներ։
Պարզվել են դեպքի հետ կապված էական մի շարք հանգամանքներ, այդ թվում միջադեպին մասնակից անձանցից մի քանիսի ինքնությունը:
«2024 թվականի մարտի 15-ին` ժամը 00:14-ի սահմաններում, Ս.Ս.-ն իր կողմնակիցների՝ Ս.Ա.-ի և քննությամբ դեռևս չպարզված անձանց հետ, «Nissan Altima» և «BMW 525 I» մակնիշի ավտոմեքենաներով Երևան քաղաքի Ֆուչիկի փողոց-Ֆուչիկի 1-ին նրբանցք խաչմերուկում հանդիպել են «Mersedes-Benz 63AMG», «Mersedes-Benz CLS 550» և «VAZ 21703-110-01» մակնիշների ավտոմեքենաներով տվյալ տարածք եկած Ա.Ղ.-ի և վերջինիս՝ դեռևս ինքնությունները չպարզված մի խումբ կողմնակիցների հետ»,- հայտնում են ՔԿ-ից։
Ս.Ս.-ն, հայհոյանքներ հնչեցնելով, ապօրինի կերպով ձեռք բերած զենքից կրակահերթ է արձակել Ա.Ղ.-ի ուղղությամբ՝ նրան կյանքից զրկելու դիտավորությամբ։ Կրակոցների հետևանքով Ա.Ղ.-ն սրունքի վիրավորում է ստացել: Ա.Ղ.-ն փորձել է Ս.Ս.-ի ձեռքից վերցնել հրազենը, ինչն ուղեկցվել է անկանոն կրակոցներով:
Այդ ընթացքում մոտեցել է նաև Ս․Ս․-ի կողմնակից Ս.Ա.-ն, որը ևս եղել է հրազենով զինված։ Ապա միացել են Ս.Ս.-ի հետ դեպքի վայր ժամանած, դեռևս ինքնությունները չպարզված անձինք, որոնք փոխլրացնելով միմյանց գործողությունները՝ ձեռքերով, ոտքերով և մահակներով, իսկ Ս.Ա.-ն՝ նաև զենքի կոթով, հարվածներ են հասցրել գետնին ընկած Ա.Ղ.-ի մարմնի տարբեր հատվածներին:
«Ա.Ղ.-ն ու Ս.Ս.-ն շարունակել են փոխադարձ հարվածներ հասցնել միմյանց, որից հետո նրանց են մոտեցել Ա.Ղ.-ի՝ դեռևս ինքնությունները չպարզված կողմնակիցները և միասնական դիտավորությամբ, փոխլրացնելով միմյանց խուլիգանական գործողությունները, հարվածներ են հասցրել Ս.Ս.-ի մարմնի տարբեր հատվածներին»,- նշված է ՔԿ հաղորդագրության մեջ:
Ինքնությունը չպարզված անձը Ս.Ս.-ին սպանելու դիտավորությամբ նրա ուղղությամբ մարտական նռնակ է նետել, պայթյունի հետևանքով պատճառվել են բեկորային վնասվածքներ:
Նռնակի պայթեցման հետևանքով հավաքված անձինք դիմել են փախուստի։ Ապա Ս.Ս.-ի և Ա.Ղ.-ի վիճաբանությունը շարունակվել է արդեն Ֆուչիկի 1 նրբանցքի մոտ գտնվող ավտոլվացման կետի դիմաց։ Ժամանել են պարեկային ոստիկանության աշխատակիցները։ Ս.Ս.-ն դեպքին մասնակից անձանց հետ դիմել է փախուստի, իսկ հրազենային վիրավորում ստացած Ա.Ղ.-ն դեպքի վայրից տեղափոխվել է հիվանդանոց:
Ս.Ս.-ի նկատմամբ ՀՀ սպանության փորձի, խուլիգանության և ապօրինի զենքի շրջանառության հոդվածներով, իսկ Ս.Ա.-ի նկատմամբ՝ խուլիգանության հոդվածով հանրային քրեական հետապնդում է հարուցվել։ Դատարանը խափանման միջոց է ընտրել կալանավորումը, նրանց նկատմամբ հետախուզում է հայտարարվել։
Ձեռնարկվում են անհրաժեշտ միջոցառումներ՝ միջադեպին մասնակից մյուս անձանց ինքնությունը պարզելու նպատակով:
