Չկա որևէ ապացույց, որ Ուկրաինան կապ ունի Crocus City Hall-ում հարձակման հետ. ԵՄ
Եվրամիությունը հերքում է Մերձմոսկվայի Crocus City Hall համալիրում տեղի ունեցած ահաբեկչությանն Ուկրաինայի մասնակցության վերաբերյալ հայտարարությունները, Բրյուսելում կայացած ճեպազրույցի ժամանակ հայտարարել է ԵՄ արտաքին քաղաքականության խոսնակ Պիտեր Ստանոն, փոխանցում է vedomosti.ru-ն։
«Մենք դա մերժում ենք, չկա որևէ բան, որը ցույց կտա կամ ապացուցի, որ Ուկրաինան կապ ունի այս հարձակման հետ»,- ընդգծել է նա։
Նրա խոսքով՝ Եվրամիությունը Ռուսաստանի իշխանություններին կոչ է անում Մոսկվայում տեղի ունեցած ահաբեկչությունը չօգտագործել «որպես պատրվակ»՝ ուժեղացնելու ճնշումն Ուկրաինայի վրա։
Հիշեցնենք, որ մարտի 22-ի երեկոյան մի խումբ զինված տղամարդիկ ինքնաձիգներից կրակ են բացել Մոսկվայի Crocus City Hall-ում, ինչից հետո տեղում պայթյուն է տեղի ունեցել և հրդեհ է բռնկվել: Հաղորդվում է առնվազն 137 զոհի մասին: ՌԴ ԱԴԾ-ն հայտարարել է, որ մարդկանց վրա կրակած ահաբեկիչները ձերբակալվել են Ռուսաստանի Դաշնության Բրյանսկի շրջանում՝ Ուկրաինայի հետ սահմանի մոտ, և որ նրանք ուղևորվում էին Ուկրաինա, քանի որ «այնտեղ կապեր ունեն»։ ՌԴ նախագահ Վլադիմիր Պուտինի խոսքով՝ ահաբեկչության համար կասկածվողների համար «պատուհան էր պատրաստվել Ուկրաինայի հետ սահմանը հատելու համար»։
