Կիմ Չեն Ընը կոչ է արել մեծացնել զորավարժությունները
Հյուսիսային Կորեայի առաջնորդ Կիմ Չեն Ընը Կորեայի ժողովրդական բանակի գլխավոր բազա կատարած այցի ժամանակ կոչ է արել ակտիվացնել «գործնական զորավարժությունները», հայտնում է KCNA-ն։
«Նա առաջ է քաշել քաղաքական նպատակներ՝ ավելի ինտենսիվ և գործնական վարժանքներ անցկացնելու համար՝ ապահովելու պատերազմում հաղթանակը», - ասվում է գործակալության հայտարարության մեջ:
Նշվում է, որ Կիմ Չեն Ընը զինվորականներին հրամայել է ուժեղացնել զորավարժությունները՝ բարելավելու մարտունակությունը՝ «ճնշող ուժով» թշնամիներին զսպելու համար, «հետևողականորեն խափանել պատերազմ սկսելու ամենափոքր փորձերը և ճշգրիտ կատարել հանձնարարված կարևոր խնդիրները»:
Հյուսիսային Կորեայի առաջնորդը երկրի արևմտյան շրջանի բազա կատարած այցի ժամանակ ստուգել է ուսումնական հաստատությունները և վերահսկել զորամասերի զորավարժությունները։
Կիմ Չեն Ընի խոսքերը հնչում են այն ժամանակ, երբ Հարավային Կորեան և ԱՄՆ-ն անցկացնում են «Ազատության վահան» խոշոր համատեղ զորավարժությունները, որոնք կտևեն 11 օր:
Հյուսիսային Կորեան արդեն դատապարտել է այս զորավարժությունները՝ ասելով, որ այդ կերպ Սեուլն ու Վաշինգտոնը «ռազմական սպառնալիք են ստեղծում և փորձում են ներխուժել ինքնիշխան պետություն»։ Փհենյանը կոչ է արել անհապաղ դադարեցնել «սադրիչ և ապակայունացնող գործողությունները»:
«ԿԺԴՀ-ի զինված ուժերը կշարունակեն վերահսկել թշնամիների արկածախնդիր գործողությունները և կշարունակեն պատասխանատու ռազմական գործողությունները՝ հզոր կերպով վերահսկելու Կորեական թերակղզում անվտանգության անկայուն իրավիճակը», - ասել է Փհենյանը:
