ՏԵՍԱՆՅՈՒԹ. ԱԱԾ սահմանապահ ջոկատի 5 նոր ուղեկալ է բացվել
ՀՀ ԱԱԾ սահմանապահ ջոկատի 5 ուղեկալ է բացվել, և դրանց կից սպայական կացարաններ են շահագործման հանձնվել։ Տեղեկությունը հայտնում է ՀՀ ազգային անվտանգության ծառայության լրատվության բաժինը` նշելով, որ բացման արարողությանը մասնակցել է ՀՀ ԱԱԾ տնօրեն, գեներալ-մայոր Արմեն Աբազյանը։
«Տարածաշրջանային գործընթացները ցույց են տալիս, որ փաստացի ավելացել է պետական սահմանի ձգվածությունը»,- իր խոսքում է ասել է Աբազյանը։
Սյունիք, Ճակատեն, Եղվարդ, Կաղնուտ, Դավիթ Բեկ սահմանապահ ուղեկալներն ամբողջությամբ ապահովված են ժամանակակից տեխնիկայով, սպառազինությամբ, անհրաժեշտ պարագաներով: Սահմանապահ զորքերի ստորաբաժանումները շարունակաբար համալրվում են տարբեր նշանակության տեխնիկական միջոցներով, կահավորվել է 18 սահմանապահ կետ, կառուցվել են խրամատներ, կրակակետեր և ցանցարկղերով սարքավորված դիտման կետեր:
Աբազյանը շեշտել է, որ սահմանապահ զորքերի վերազինումն ու արդիականացումը ժամանակի հրամայականն են տարածաշրջանում տարածված ռիսկերի պայմաններում՝ ապօրինի թմրաշրջանառությունից մինչև ահաբեկիչների տեղափոխում, անօրինական միգրացիայից մինչև մաքսանենգություն։
Նշենք, որ 2020 թվականի դեկտեմբերից ՀՀ ԱԱԾ սահմանապահ զորքերը ՀՀ ՊՆ ստորաբաժանումներից փուլային տարբերակով պահպանության են ընդունել հայ-ադրբեջանական սահմանի որոշ հատվածներ: Նոր ձևավորված տեղամասի պահպանությունն առավել արդյունավետ կազմակերպելու համար ՀՀ կառավարության կողմից հատկացված միջոցներով շատ կարճ ժամանակահատվածում կառուցվել են ժամանակակից պահանջներին համապատասխան սահմանային ուղեկալներ:
