Մերժվել է Մհեր Ենոքյանին վաղաժամկետ պայմանական ազատ արձակելու դիմումը
Ցմահ դատապարտված Մհեր Ենոքյանը վաղաժամկետ պայմանական ազատ չի արձակվի։ Այս մասին Sputnik Արմենիային հայտնեցին դատական դեպարտամենտից։
Դատավոր Մասիս Մելքոնյանը Երևանի ընդհանուր իրավասության դատարանի «Ավան» նստավայրում մերժել է միջնորդությունը։
Նշենք, որ Մհեր Ենոքյանին պայմանական վաղաժամկետ ազատ արձակելու վերաբերյալ միջնոդություն էր ներկայացրել փաստաբան Զարուհի Մեջլումյանը։
Հիշեցնենք` 1996թ–ին սպանվել էր Երևանի բժշկական համալսարանի ուսանող, 1975թ–ին ծնված Իոսիֆ Աղաջանովը։ Սպանության համար մեղադրանք էր առաջադրվել համակուրսեցուն` Մհեր Ենոքյանին ու նրա եղբոր դասընկերոջը` Արամ Հարությունյանին։
Քրգործի համաձայն` 1996թ. հուլիսի 12-ին Երևանի բնակիչ Ենոքյանը, համաձայնության գալով Հարությունյանի հետ, իր համակուրսեցի Իոսիֆ Աղաջանովին սպանելու և դիակի տեղը հայտնելու համար վերջինիս ծնողներից 20 000 դոլար պահանջելու նպատակով, Աղաջանովին տարել են Հարությունյանի բնակարան, որտեղ առանձին դաժանությամբ սպանել են Աղաջանովին:
Դատաքննության ընթացքում Ենոքյանն իրեն մեղավոր չի ճանաչել։ Արամ Հարությունյանն ի սկզբանե ընդունել է մեղքը` դատապարտվելով 15 տարվա ազատազրկման: Գործին կցված փաստացի ապացույցները վարույթի ավարտից հետո ոչնչացվել են։
Նշենք, որ 2022–ի սեպտեմբերի 2–ին որոշում է կայացվել Ենոքյանի պատժի կրման ռեժիմը մեղմացնելու վերաբերյալ։
Ենոքյանին կիսաբաց ռեժիմից տեղափոխել են բաց ռեժիմ։ Այդ ռեժիմով դատապարտյալն իրավունք ունի ժամը 08:00-20:00-ն դուրս գալ քրեակատարողական հիմնարկից։ Նա վերադառնալուց հետո կարող է քնել մյուս դատապարտյալներից առանձին՝ դատապարտյալներին պահելու գոտուց դուրս հատկացված կացարաններում:
