ՌԴ-ն հետախուզում է հայտարարել Լինդսի Գրեմի նկատմամբ

Ռուսաստանի ՆԳՆ-ն հետախուզում է հայտարարել ամերիկացի սենատոր Լինդսի Գրեմի քրեական հոդվածով (ներառված է ահաբեկիչների և ծայրահեղականների ցանկում) նրա նկատմամբ նոր քրեական գործ հարուցելուց հետո: Դա բխում է գերատեսչության հետախուզման բազայից։ Տեղեկությունը փոխանցում է ՏԱՍՍ-ը։

«1955 թվականի հուլիսի 9- ին ծնված ամերիկացի Գրեմ Լինդսի Օլինը հետախուզվում է քրեական օրենսգրքի հոդվածով»,- ասվում է գերատեսչության բազայում՝ առանց հստակեցնելու, թե որ հոդվածով: Ընդ որում, նշվում է, որ Գրեհեմի նկատմամբ հետախուզում է հայտարարվել։

Իրավապահ մարմիններից ՏԱՍՍ-ին հայտնել են, որ ԱՄՆ սենատորի նկատմամբ նոր քրեական գործ է հարուցվել: Ընդ որում, գործակալության զրուցակիցը չի հստակեցրել հոդվածը:

Լրատվամիջոցը նշում է, որ Սենատոր Գրեհեմը հայտնի է իր հակառուսական դիրքորոշմամբ։ Նա ՌԴ-ի դեմ պատժամիջոցների խստացման տարբեր տարբերակներ էր առաջարկում։ Փետրվարի 18- ին նա հերթական անգամ առաջարկել է Ռուսաստանին ներառել ԱՄՆ-ի կողմից կազմվող ահաբեկչության հովանավոր երկրների ցանկում՝ դրա համար որպես պատրվակ օգտագործելով Ալեքսեյ Նավալնիի մահը:

Ավելի վաղ՝ փետրվարի 20-ին, Ռոսֆինմոնիտորինգը Գրեհեմին ներառել էր ահաբեկիչների ու ծայրահեղականների ցանկում։ Ռուսաստանի ՆԳՆ-ն քրեական հոդվածով նրա նկատմամբ հետախուզում էր հայտարարել անցյալ տարվա մայիսին։ Այն ժամանակ ՌԴ Քննչական կոմիտեի նախագահ Ալեքսանդր Բաստրիկինը հանձնարարել էր քրեական գործ հարուցել Գրեմի ռուսատյաց արտահայտությունների փաստով։