Գերմանիան և Թուրքիան սերտ համագործակցում են, չգիտեմ՝ ՀՀ-ին գերմանական միջնորդությունն ինչ կարող է տալ. Խաչատրյան

ԱԺ «Հայաստան» խմբակցության պատգամավոր Արթուր Խաչատրյանն անդրադարձել է Մյունխենում Գերմանիայի կանցլերի միջնորդությամբ Հայաստանի վարչապետի և Ադրբեջանի նախագահի հանդիպմանը։

«Գերմանիան և Թուրքիան սերտ համագործակցում են, չգիտեմ՝ Հայաստանին գերմանական միջնորդությունն ինչ կարող է տալ»,- ասել է նա ճեպազրույցում։

Ըստ Խաչատրյանի՝ տեղի է ունենում բանակցային ֆորմատի փոփոխություն։

«Հայաստանը հրաժարվում է օգտվել ռուսական առաջարկներից, Ադրբեջանն Արևմուտքից, հատկապես՝ Բրյուսելից, ստանալով այն, ինչ ցանկանում էր, հրաժարվում է մեկնել Բրյուսել, արևմտյան հարթակներ։ Միացյալ Նահանգները հայտարարում է, որ խրախուսում է ադրբեջանական անմիջական շփումների առաջարկը․ այսինքն, ձեռքերը լվանում է այդ ամենից և ասում, որ միջնորդ չի։ Հասկանալի է՝ բազմաթիվ խնդիրներ ունեն․ Մերձավոր արևելք, Ուկրաինա։ Չգիտեմ՝ Գերմանիան ինչու ծագեց»,- նշել է նա։

Խաչատրյանը նշել է, որ դեռ 90-ականներից էր դիտարկվում Գերմանիայի թեկնածությունը, սակայն հայկական կողմը համաձայն չի եղել։

«Չգիտեմ, թե գերմանական միջնորդությունն ինչ կարող է տալ»,- եզրափակել է նա։