Ռուսաստանի, ԱՄՆ-ի և Գերմանիայի միջև քննարկվել է Նավալնիի փոխանակումը. Bild
Ռուսաստանը մտադիր էր կալանավայրում վերջերս մահացած ընդդիմադիր Ալեքսեյ Նավալնիին փոխանակել ԱԴԾ գաղտնի բաժնի աշխատակից Վադիմ Կրասիկովի հետ։ Այս մասին հայտնում է գերմանական Bild պարբերականը՝ հղում անելով իր աղբյուրներին:
Պարբերականի տվյալներով՝ փոխանակման շուրջ բանակցությունները տեղի են ունեցել Ռուսաստանի, ԱՄՆ-ի և Գերմանիայի միջև։
Նշվում է, որ Վլադիմիր Պուտինը ցանկացել է երկիր վերադարձնել գործակալ Վադիմ Կրասիկովին, որն այժմ գտնվում է գերմանական բանտում:
Պարբերականը նշել է, որ Պուտինն այդ մասին ակնարկել է ամերիկացի լրագրող Թաքեր Կառլսոնին տված հարցազրույցում։
Վադիմ Կրասիկովը (նույն ինքը՝ Սոկոլովը) ցմահ ազատազրկման է դատապարտվել չեչեն նախկին հրամանատար Զելիմխան Հանգոշվիլիի սպանության համար, որը նա իրականացրել էր 2019 թվականի օգոստոսի 23-ին Բեռլինում։
Սեպտեմբերին The Wall Street Journal-ը հայտնել էր, որ Ռուսաստանի իշխանությունները հնարավորություններ են փնտրում լրագրող Էվան Գերշկովիչին և Ռուսաստանի Դաշնությունում այլ ամերիկացի բանտարկյալներին Վադիմ Կրասիկովի հետ փոխանակելու համար: Պարբերականի տեղեկություններով՝ փոխանակմանը կարող էր մասնակցել Ալեքսեյ Նավալնին։
