Լավ է, որ երկու կողմերն էլ պայմանավորվել են բաց հարցերը լուծել առանց նոր բռնությունների․ Շոլց
Գերմանիան և Եվրոպան պատրաստ են հնարավորինս աջակցել Հայաստանի և Ադրբեջանի միջև խաղաղության բանակցություններին։ Այս մասին գրել է Գերմանիայի Կանցլեր Օլաֆ Շոլցը:
«Գերմանիան և Եվրոպան պատրաստ են իրենց հնարավորությունների սահմաններում աջակցել Հայաստանի և Ադրբեջանի միջև խաղաղ բանակցություններին։ Ես դա հաստատել եմ երկու երկրների հետ քննարկումներում։ Լավ է, որ երկու կողմերն էլ պայմանավորվել են բաց հարցերը լուծել առանց նոր բռնությունների»,- գրել է Շոլցը:
Մյունխենի անվտանգության համաժողովի շրջանակում եռակողմ հանդիպում է տեղի ունեցել Նիկոլ Փաշինյանի, Գերմանիայի կանցլեր Օլաֆ Շոլցի և Ադրբեջանի նախագահ Իլհամ Ալիեւի հետ:
Շոլցը նաև կոչ է արել շուտափույթ ավարտել Հայաստանի և Ադրբեջանի միջև խաղաղության բանակցությունները: Այս մասին ասվում է Գերմանիայի կառավարության պաշտոնական կայքում։
«Կանցլերը նշել է չլուծված հարցերն ու կարծիքների տարբերությունները բացառապես խաղաղ երկխոսության միջոցով և առանց ուժի կիրառման լուծելու կողմերի հանձնառությունը: Եռակողմ քննարկումների ընթացքում կանցլերը կոչ է արել շուտափույթ ավարտել երկու երկրների միջև խաղաղ բանակցությունները։ Գերմանիան և Եվրոպան, ընդհանուր առմամբ, պատրաստ են առավելագույնս աջակցել այդ գործընթացին, այդ թվում` ԵՄ Խորհրդի նախագահ Շառլ Միշելի ջանքերով»,– ասված է հաղորդագրությունում։
