ՌԴ–ի համար ավելի լավ կլինի, եթե Բայդենը հաղթի ԱՄՆ ընտրություններում. Պուտին
ՌԴ նախագահ Վլադիմիր Պուտինը հայտարարել է, որ Մոսկվան ավելի շուտ կնախընտրեր Ջո Բայդենին ԱՄՆ նախագահի պաշտոնին, քան Դոնալդ Թրամփին։ Այս մասին նա ասել է լրագրող Պավել Զարուբինին տված հարցազրույցում։
Զարուբինը Պուտինին հարցրել է. «Ո՞վ է մեզ համար ավելի լավ՝ Բայդենը, թե Թրամփը»:
«Բայդենը: Նա ավելի փորձառու մարդ է, կանխատեսելի է, հին կազմավորման քաղաքական գործիչ է։ Բայց մենք կաշխատենք ԱՄՆ-ի ցանկացած առաջնորդի հետ, ում վստահում է ամերիկացի ժողովուրդը»,- պատասխանել է Պուտինը:
Ռուսաստանի նախագահին նաև հարցրել են, թե ինչպես է նա վերաբերվում Բայդենի առողջական վիճակի մասին լուրերին։ Պուտինի խոսքով՝ դա պայմանավորված է նաեւ ԱՄՆ-ում նախընտրական քարոզարշավով։
«Կարծում եմ, որ ԱՄՆ-ում ներքաղաքական քարոզարշավը, նախընտրական քարոզարշավը թափ է հավաքում: Այն ձեռք է բերում ավելի ու ավելի սուր ձևեր։ Եվ մեր կողմից այս գործընթացին միջամտելը տեղին չէ։ Տեսեք, ես հանդիպել եմ Բայդենին Շվեյցարիայում, սա երեք տարի առաջ էր։ Այն ժամանակ էլ ասում էին, որ նա ապաշնորհ է։ Ես նման բան չտեսա։ Դե, այո, նա նայեց իր թղթին, ես նայեցի իմին։ Ոչինչ։ Իսկ այն, որ ինչ-որ տեղ, ուղղաթիռից իջնելով, խփել է գլխին, դե... Մեր երկրում ով ինչ-որ տեղ գլուխը չի խփել, թող առաջինը քար նետի իր վրա»,- ասել է ռուսաստանցի նախագահը:
Նա հավելել է, որ, իր կարծիքով, ԱՄՆ վարչակազմի ներկայիս դիրքորոշումը «խիստ վնասակար է և սխալ»։ «Եվ ես այդ մասին ժամանակին ասել եմ նախագահ Բայդենին», - եզրափակել է Պուտինը:
