Ադրբեջանի ԱԳՆ-ն արձագանքել է Նիկոլ Փաշինյանի այսօրվա ելույթին

Ադրբեջանի ԱԳՆ-ն արձագանքել է վարչապետ Նիկոլ Փաշինյանի այսօրվա ելույթին․ 

«Նախ, պետք է նշել, որ ագրեսիա անվանել մեր զինծառայողի վիրավորմանն ի պատասխան Ադրբեջանի ձեռնարկած միջոցները, նշանակում է կեղծել փաստերը»,- ասված է նրանց հայտարարության մեջ։ Ըստ նրանց՝ սահմանին տեղի ունեցածը խաթարել է «գրեթե 5 ամիս տիրող կայունությունը»․

«Կցանկանայինք հիշեցնել Ադրբեջանի տարածքային ամբողջականության նկատմամբ շարունակվող հավակնությունների մասին, որոնք արտացոլված են Հայաստանի սահմանադրության, գործող օրենսդրական ակտերի, պաշտոնական նամակների, պաշտոնական հայտարարությունների, միջազգային կազմակերպությունների և դատարանների կողմից տարածվող փաստաթղթերի մեջ:

Եթե հայկական կողմն իսկապես շահագրգռված է խաղաղ գործընթացով, պետք է հրաժարվի Ադրբեջանի տարածքային ամբողջականության և ինքնիշխանության նկատմամբ հավակնություններից»,- հայտնել են Ադրբեջանի ԱԳՆ-ից։

Ադրբեջանի ԱԳՆ-ն արձագանքել է նաև սահմանամերձ գյուղերի վերաբերյալ Փաշինյանի հայտարարությանը. «ՀՀ վարչապետը, խոսելով Ադրբեջանի անկլավների և էքսկլավների մասին, ևս մեկ անգամ հայտարարեց, որ Ադրբեջանը, իբր, օկուպացրել է 31 գյուղերի տարածքներ. դա ոչ այլ ինչ է, քան քաղաքական շահարկում։ Ուզում ենք հիշեցնել Փաշինյանին, ով իր նախկին հայտարարություններում ասում էր, թե իբր նման 32 գյուղ կա, և որ Հայաստանը պարտավոր է վերադարձնել ադրբեջանական ութ գյուղերը»։