Աբասը ՀԱՄԱՍ–ին կոչ է անում գործարք կնքել Իսրայելի հետ՝ Ռաֆահում կռվելուց խուսափելու համար

Պաղեստինի ազգային վարչակազմի ղեկավար Մահմուդ Աբասը կոչ է արել ՀԱՄԱՍ ահաբեկչական խմբավորմանը հնարավորինս շուտ համաձայնության գալ Իսրայելի հետ պատանդների և գերիների փոխանակման հարցում՝ Գազայի հատվածում իրավիճակի էլ ավելի սրումից խուսափելու համար։ Այս մասին հայտնում են պաղեստինյան լրատվամիջոցները։

«Գազայի հատվածում և Արևմտյան ափին, ներառյալ Արևելյան Երուսաղեմում պաղեստինցի ժողովրդի դեմ ծավալված զանգվածային պատերազմի լույսի ներքո, մենք կոչ ենք անում ՀԱՄԱՍ-ին արագ ավարտին հասցնել գերիների փոխանակման գործարքը՝ պաղեստինցի ժողովրդին փրկելու համար ոչ պակաս սարսափելի աղետից, քան 1948 թ.–ին էր (զանգվածային արտագաղթ` արաբա-իսրայելական պատերազմից հետո) և խուսափել Իսրայելի կողմից Ռաֆահ քաղաքի օկուպացիայից»,- ասել է Աբասը։

Նա նաև կոչ է արել ԱՄՆ վարչակազմին և արաբական երկրներին «լրջորեն աշխատել՝ ապահովելու, որ համաձայնությունը հնարավորինս շուտ ձեռք բերվի, որը կօգնի պաշտպանել Պաղեստինի ժողովրդին ավերիչ պատերազմի պատուհասից»:

«Եկել է ժամանակը, որ բոլորը պատասխանատվություն ստանձնեն պաղեստինյան ժողովրդի դեմ այս զանգվածային պատերազմին վերջ դնելու համար»,- ասել է Աբասը։

Այժմ իսրայելական բանակը պատրաստվում է գրոհել Գազայի հատվածի հարավում՝ Եգիպտոսի հետ սահմանին գտնվող Ռաֆահ քաղաքը, որտեղ անկլավի 2,3 միլիոն բնակիչներից մոտ 1,5 միլիոնը պատսպարվում է մարտերից։ Իսրայելական կողմի տվյալներով՝ քաղաքում ապաստան են գտել ՀԱՄԱՍ-ի զինյալների մնացած կազմավորումները։ ՄԱԿ-ը և շատ երկրներ կոչ են անում Իսրայելին հրաժարվել այդ ծրագրերից։

Աբբասը նշել է, որ Ռաֆահի վրա հարձակումը «կհանգեցնի հազարավոր զոհերի, տառապանքների և պաղեստինցիների զանգվածային փախուստի»: