Ադրբեջանը կոչ է անում հայկական կողմին խուսափել ռազմական էսկալացիայից. Ադրբեջանի ԱԳՆ

Հայաստանի արտաքին գործերի նախարարության հայտարարություններն այն մասին, որ ադրբեջանական զինուժի ձեռնարկած միջոցներն էսկալացիայի պատրվակ են, միանգամայան անհիմն են։ Այս մասին ասված է Ադրբեջանի ԱԳՆ հայտարարության մեջ։

«Ռազմական սադրանքից հետո, որը հանգեցրել է ադրբեջանցի զինծառայողի վիրավորմանը, ադրբեջանական կողմը վերացրել է հայկական դիրքից բխող վտանգը։ Այս միջոցը զուտ պատասխան գործողություն էր։ Ադրբեջանը հավատարիմ է խաղաղության գործընթացին և կոչ է անում հայկական կողմին խուսափել ռազմական էսկալացիայից, ինչը կարող է վտանգել այդ ուղղությամբ ջանքերը»,- նշել են գերատեսչությունում։

Փետրվարի 13-ին Ներքին Հանդի հատվածում տեղակայված հայկական դիրքերի ուղղությամբ Ադրբեջանի ԶՈՒ կրակի հետևանքով հայկական կողմն ունի 4 զոհ և 1 վիրավոր: