«Զանգեր» կոչվող հատվածում տեղ-տեղ մերկասառույց է. կան փակ և դժվարանցանելի ճանապարհներ
Հունվարի 31-ին՝ ժամը 09։00-ի դրությամբ, Մեղրիի լեռնանցքում թույլ ձյուն է տեղում: Այս մասին հայտնում է «Ճանապարհային դեպարտամենտը»։
Հաղորդվում է, որ Արագածոտնի մարզում «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները փակ են:
«Սիսիանի «Զանգեր» կոչվող հատվածում տեղ-տեղ մերկասառույց է։ Ստեփանավանի և Վարդենյաց լեռնանցքները դժվարանցանելի են կցորդով տրանսպորտային միջոցների համար։ Բայց միջպետական և հանրապետական նշանակության բոլոր ավտոճանապարհները բաց են», -ասվում է հայտարարության մեջ:
Գերատեսչությունից հայտնում են, որ ավտոճանապարհներին իրականացնում են մաքրման և աղ-ավազով մշակման աշխատանքներ:
Վթարներից, պատահարներից և խցանումներից խուսափելու համար վարորդներին խորհուրդ է տրվում երթևեկել բացառապես ձմեռային անվադողերով:
