Ռուսաստանում հեռակա կարգով կալանքի որոշում է կայացվել Նավալնիի չորս համախոհների նկատմամբ
Մոսկվայի Բասմաննի շրջանի դատարանը հեռակա կարգով կալանավորել է Կոռուպցիայի դեմ պայքարի հիմնադրամի աշխատակիցներ, օտարերկրացի գործակալներ ճանաչված Մարիա Պևչիխին, Դմիտրի Նիզովցևին, Կիրա Յարմիշին և Աննա Բիրյուկովային: Այս մասին տեղեկանում ենք BBC-ից։
Նրանք մեղադրվում են ծայրահեղականության, ահաբեկչությունն արդարացնելու, վանդալիզմի և բանակի մասին «ֆեյքեր» տարածելու մեջ։
Կոռուպցիայի դեմ պայքարի հիմնադրամը Ռուսաստանում համարվում է ծայրահեղական կազմակերպություն և արգելված է: Այդ կառույցը հիմնադրել է Ռուսաստանի ընդդիմության ազատազրկված լիդեր Ալեքսեյ Նավալնին:
Բասմաննի շրջանի դատարանի վճռով նշված չորս քաղաքացիների համար հեռակա կարգով խափանման միջոց է ընտրվում երկու ամիս կալանավորումը՝ նրանց Ռուսաստանի Դաշնության տարածք արտահանձնելու կամ Ռուսաստանի Դաշնության տարածքում ձերբակալելու պահից:
Հավելենք, որ չորս ակտիվիստները գտնվում են Ռուսաստանի սահմաններից դուրս: Յարմիշի նկատմամբ այսօր երկրորդ անգամ հետախուզում է հայտարարվել:
