Որն է Գերմանիայի` Թայվանի հետ համագործակցության ընդլայնման պայմանը

Գերմանիան հայտարարել է «Մեկ Չինաստան» սկզբունքի շրջանակներում Թայվանի հետ համագործակցությունն ընդլայնելու պատրաստակամության մասին։ Այս մասին հայտնում է Գերմանիայի արտաքին գործերի նախարարությունը։

Նախարարությունը շնորհավորել է «բոլոր ընտրողներին ու թեկնածուներին, ովքեր մասնակցել են այս ընտրություններին, ինչպես նաև նրանց, ովքեր ընտրվել են»։

Գերմանիայի արտաքին գործերի նախարարության հայտարարության մեջ նշվում է, որ Գերմանիան շատ ոլորտներում սերտ հարաբերություններ է պահպանում Թայվանի հետ և ցանկանում է հետագայում ընդլայնել դրանք՝ համաձայն «Մեկ Չինաստան» քաղաքականության:

Բացի այդ, նախարարությունն ընդգծել է տարածաշրջանում խաղաղության և կայունության պահպանման կարևորությունը։

«Գերմանիան հավատարիմ է ստատուս քվոյի պահպանմանը և վստահության ձևավորմանը: Ստատուս քվոյի փոփոխությունը կարող է տեղի ունենալ միայն խաղաղ ճանապարհով և փոխադարձ համաձայնությամբ։ Մենք հուսով ենք, որ երկու կողմերն էլ կշարունակեն ջանքեր գործադրել երկխոսությունը վերսկսելու համար»,- հայտնել են գերմանացի դիվանագետները։