Շառը Միշելը կհեռանա Եվրոպական խորհրդի նախագահի պաշտոնից. հայտնի է՝ ինչու

Եվրոպական խորհրդի ներկայիս նախագահ Շառլ Միշելը հայտնել է, որ մասնակցելու է Եվրախորհրդարանի ընտրություններին և ամռանը կլքի իր պաշտոնը՝ զբաղեցնելու պատգամավորի աթոռը. նրա մանդատի ժամկետը լրանում է 2024 թվականի նոյեմբերի վերջին: Այս մասին տեղեկանում ենք ՌԻԱ «Նովոստի»-ից:

Նշվում է, որ նախորդ օրը բելգիական Soir պարբերականը հաղորդել էր, որ Միշելը կարող է ղեկավարել Բելգիայի լիբերալ կուսակցության բարեփոխումների շարժման թեկնածուների ցուցակը Եվրախորհրդարանի առաջիկա ընտրություններում:

«Ես որոշել եմ մասնակցել 2024 թվականի հունիսին կայանալիք եվրոպական ընտրություններին»,- ասել է Միշելը բելգիական առաջատար լրատվամիջոցներին տված հարցազրույցում։

Վերջինս պարզաբանել է, որ Եվրոպական խորհրդի նախագահի պաշտոնը չի կարող զուգակցվել Եվրախորհրդարանի անդամի աշխատանքի հետ, ուստի նա հրաժարական կտա մինչև հուլիսի 16-ը` նոր գումարման Եվրախորհրդարանի պատգամավորների երդման օրը: Նշենք, որ Եվրոպական խորհրդի նախագահի պաշտոնում Շառլ Միշելի լիազորությունները ավարտվում են 2024 թվականի նոյեմբերին, իսկ ընտրությունները տեղի կունենան հուլիսին։

Միշելը նաև ասել է, որ Եվրամիության երկրների և կառավարությունների ղեկավարները հունիսի վերջին-հուլիսի սկզբին կհավաքվեն գագաթնաժողովի համար՝ ընտրելու Եվրոպական խորհրդի նոր նախագահին։ Նա հույս է հայտնել, որ իր իրավահաջորդը պաշտոնը կստանձնի ամռանը։ Հակառակ դեպքում Եվրոպական խորհրդի ղեկավարի գործառույթները կարող են փոխանցվել Հունգարիային, որն այդ պահին նախագահելու է ԵՄ խորհուրդը։